Talan KṬP Unit, Hmarbiel North Presbytery chun General Fund – One Day for Christ (ODC) biel pumpuia a pe ṭha tak lawmman a zâwna an lâk lawmna May 13, 2025 khan ruoiṭhe meuin puithu takin an hmang.
Tukum KṬP General Conference vawi 41-na Shillong hun a khan Talan unit hi ODC a thaw ṭha tak lawmman sumfâi ₹ 5,000 zet inhlan an lo nih. Talan Unit hi member 16 chau an ni a, an rêngin ODC an pêk seng a, ₹ 15,480/- lâi an pêk phâk a, mi pakhatin ₹ 967/- a pêk phâk tîna a nih.
Hi lawmna Programme a hin fiela um angin, Presbytery KṬP Chairman, Secretary le Bieltu Pastor ha’n hun an va hmangpui.
Programme hi chawhma inkhawmna huna hmangin Upa Lalruotṭhieng, Chairman, Presbytery KṬP-in thuhrilna hun a hmang a, sûn hun ruok hi chu insukhlimna’n hun hmang a nih. Zantieng lâwmna ruoi, Pathien kuomah inhlanna hun Pastor Lalronghak, Bieltu Pastor-in a hmang zoin, khawp le thlai takin an kil tlang. Zan hunah Worship Service Programme hmang nâwk a ni a, Pastor Lalsanglawm, Secretary, KṬP Hmarbiel North Presbytery-in thuhrilna hun a hmang thung.
Report: Mr. Anthony R. Infimate
CKṬP Media Ministry Correspondent
Hmarbiel North Presbytery
