Ten Year Plan ei nei (2000) a inthawk khan biel pumpui huopa izawmkhâwmna hin nasa takin hma a sâwn a. Kohran pakhata ṭhalai member po pohai chu thukhat vuoin, lungruol takin thlâithlêng pakhat ei awt tlâng a, Chuong thilhai chu hieng ang hi a nih:

1. KṬP DAY (February 16)

Nei ṭan dân: Biel pumpuia ṭhalaihai hi thukhat vuoa, lungril hmunkhat puta kal ei châwi theina ding le, thu le hlaa ei insukhmasâwn theina dingin KṬP Day hi nei ve ta inla tiin kum 2000 khan Rengkai khuoah, General Conference 17na, Resolution No. 3na chun nguntakin a ngaituo hnungin KṬP General Conference hmasatak, Ngurte khuoa ei lo neina hun hi KṬP Day-a hmang dingin a lo rêl ta a nih. Amiruokchu, hi ni hi Anniversary anga hmang ding niloin, Ṭhalai General Conference ei hmangna hmasatak hrietzingna dinga hmang lem ding a nih.

Hmang dân ding:

  1. Hi ni hi unit tinin ursûn tak hmang seng ding
  2. Hi ni hin unit tinin KṬP Flag keipharna hunser ursun taka hmang hlak ding.
  3. Chawhma chu worship service nei ning a ta, chawhnung tieng ruok chu unit ṭha ti dân anga fellowship or sports khawm hmang thei ning a tih.
  4. Local Committe leh inhrepawa zân programme buotsai ning a tih.
  5. Zân programme-a hin ODC challenge le inhrilhrietna nei zie ding a nih.
  6. Sûn programme hmang theilohai khawma zân programme bêk chu hmang tum ding a nih.

2. KṬP WEEK (Last Week of May):

NEI ṬAN DÂN LE A THILTUM: Ṭhalai nun hi Pathien thu le Hla bâkah tulai khawvel hmasâwn pei le enmil tung pei a item chi tum tum le programme chi tum tum hmanga inenkawl ṭûl châng a lo um a. Chu chu ding chun chawlkar khat hi ṭhalai puol bika hun buotsai ni raw se tiin kum 2002 kum bawk khan General Conference vawi 19-na, resolution 11-nain a rêl a nih. Chun, a hun thua khawm kum khat sunga activity a tlâk inruol thei dân ding ngaituoin May thla chawlkar hnina ni dinga rêl a na; rêl a ni hnungin Mother’s Day hmang hi Assembly in a hung rawt nâwk leiin chawlkar thumna (third week of May) a sawn a nih a; chu hnungin Hmar Martyr’s Day leh ân tuok hlak leiin chawlkar nuhnungtak (last week of May) a dingin, 29th Gen. Conference, Phuaibuang Khuoah kum 2013 khan hmang lem ta dingin a lo rêl ta a nih. Chawlkar nuhnungtak (last week of May) ti hin Pathienni nuhnungtak hmaa chawlkar chu a nih.

HMANG DÂN DING:

  • Biel dang danghai khawsak dân ân ang nawh a; chuleiin, General Conference/Central Committee/Executive Committee in a hranpaa inang tlânga hmang dinga a rêl a ni ngawt naw chun mani presbytery committee sengin mani biel sunga hmang dân ding programme siem a ta, thupui khawm a nuom nuom thlang a tih. Chu dungzui pei chun unit committee khawma item chi tum tum siemin chawlkar khat sunga hmang dân ding ruohman hlak a tih. Chun week sûng hin Unitin ṭha a ti ang peiin thawlâwm dâwl hlak a tih.
  • KṬP Week sung hin a theina hmuna chun ni khat bêk kohran/khawtlângah ṭhangpui ngaihai ṭhangpuina (voluntary work) nei hlak ding a nih.

3. PASTOR BIEL FELLOWSHIP:

Ṭhalaihai hi thothâng ṭhatak tak le Pathien rama rawngbâwlna chi tum tum thafân taka ei nei zing lai hin phurna thar leh taksa le thlarau tienga hrâtna thar ei nei theina ding ngaituo zing pumin Pastor Biel Fellowship hi buotsai a nia, asan chu ei rawngbâwlnaa la ṭhang velo, kut le ke zawi ta hai ṭhuoisuokna dingin thu le hla chau niloin taksa tienga insukhlimna chi tum tum buotsai ah hmathar ei lâk theina dingin a remchang ang peiin Pastor biel peiah Fellowship Program a phuisui thei ang taka buotsaiin, a thei hai chun ruoiṭhea hlimtaka hun hmanghlak ding a nih.