Media Khawvel hi nasatakin an ṭhanga, ei khawvel khawm digital world tia ko hiel ani tah. Khawvel hmasawnna hmu le hmang mek tu khawm ṭhalai hai an hung ni pei ta leiin, Kristien Ṭhalai Pawl khawmin ei rawngbawlna suklien ve pei a tul zie hrein 38th General Conference, 2022 resolution 3na chun Youtube Channel nei nisien tiin a lo rel a. Chun, 39th General Conference, 2023 resolution 6na chun Ṭhalai Kantu E-Bulletin khawm Facebook page le Instagram a thlak nisien tiin rel a nih. Hienga digital platform ei nei ta si chun Internet le social media hmanga ṭhalaihai lai rawngbâwlna hlâwk taka nei a ni theina dingin Media Ministry hi 40th General Conference (2024) chun hrât taka fepui a ni theina ding ngaituoin, Central Committee fethlengin, Media Ministry fepuidân ding ziek ngêia buotsai ni sien tiin a lo rêl a. Hi Ministry fepuitu dingin internet le social media tienga thiem thil nei, mi bîkhai, Executive Committee-in ruotin, Sub-Committee pakhat ni’ng an tih.

I. Media Ministry Thil Tum Hai:

  1. Media hmanga KṬP thiltumhai sukpuitling dinga phursuok
  2. CKṬP le biel tina ṭhalaihai hmalâkna (activities), rawngbâwlna le project hai inhrilhrietna le inhrietpawna siem
  3. Hmun tina ṭhalaihai Pathien thu le hlaa châwm le enkawl
  4. Hmun tina KṬP member hai lâi inlâchinna siemṭha
  5. Media hmangruo le thuomhnaw (equipments)-a intodel
  6. Kohranpui le Department dang danghai ṭhangkaipui thei ding khawpa media tienga insukhrât le insukhmasâwn

II. CKṬP MEDIA MINISTRY COMMITTEE

Media Ministry tienga mawphurtu le hma latu dingin Executive Committee hnuoiah Sub-Committee indin ning a ta, a hmingah CKṬP MEDIA MINISTRY COMMITTEE ti ning a tih; Committee hminga sin thawtuhai hi CKṬP Media Ministry Team tia ko ning an tih.

1. Member Ding Hai:
Ex-Officio Member: CṬKP Chairman, Secretary le YCO
Thlang (elected): 4 (Four)
Ruot (Nominate): 4 (Four) chen

2. Member ding thlang dân:

  1. Executive Committee in thlang a tih.
  2. Chairman chu Executive Committee laia mi Executive Committee in ruot a tih.
  3. Chairman inrawina hnuoia Secretary le Nominate seat member ding hai chu thlang/ruot an tih.

3. Term of Office: CKTP election kum zuiin office chel sung chu kum thum ning a tih.

III. A Sin Ding Le A Hmalakna Ding Hai:

  1. Central KṬP hminga social media accounts, hieng YouTube channel, Instagram page, Facebook page, Facebook group, WhatsApp channel, WhatsApp group hai siemin, enkawlin, insuo ding ngaituo’ng a tih.
  2. CKṬP le biel tina ṭhalai activities le rawngbâwlna hai thlalak le a thu changtlung taka buotsaiin, social media page-a hai insuo hlak a tih.
  3. CKṬP Programme le KṬP niserhai promotional flyer format dang danga (image/reels/shorts) siemin, social media channel-a hai thedar hlak a tih.
  4. CKṬP Programme haia ṭul ang ang documentation thaw in, mitin en thei dingin Live broadcast thaw hlak a ta, item izirin video snippets siemsa hlak bawk a tih.
  5. CKṬP project le sumhnâr hai promotional campaign thei ang angin thaw hlak a ta, hi le inzawma ei ngirhmun video report insuo hlak a tih.
  6. CKṬP social media page-a hai activities a um theina dingin Bible chang le Spiritual Quotes hai poster-a siema, insuo.
  7. Topical Sermon, Testimonial, Interview, Drama, Skit, Movie, Music Video siemin, a remchâng angin YouTube channel-ainsuo.
  8. Bible study le KṬP Common Subject inchûkna video buotsai.
  9. Nun beidawng le harsatna nei hai sawmdawlna dinga platform siempek.
  10. Committee resolution hai Executive Committee-ah pelut hlak a tih.

IV. Sum Thu:

  1. CKṬP Media Ministry Budget huom sûnga sum hmang ṭûlnahai chu CKṬP Treasurer fethlenga hmang hlak ning a tih.
  2. Budget puotienga sum hmang ṭûlna chu Executive Committee kuomah intlun a tih.
  3. Media Ministry le inzawma inkhawmpui le sin tam changa sin thawtuhai kuomah lawmman (honorarium) Media Ministry Committee-in siempekthei a tih.
  4. CKṬP programme le inzawma inzinna TE chu CKṬP-in tum a tih.
  5. Kohranpui (General Headquarters/Presbytery) le Kohran sunga Department danghaiin Media Ministry Team an sawr nuom chun Allowance, TE le hmangruo hmang man pein sawrthei an tih.