1. THALAI KANTU MAGAZINE

Biel pumpuia Ṭhalaihai inhrietpawna ṭhalem a um theina dingin tiin kum 1983 February 27 khan Sielmatah Chanchinbu pakhat ṬHALAI KANTU lo indin a nih. Chutaka Editorial Board hmasatakhai chu hienghai hi an nih:

Editor: Upa Fimtanglien
Jt. Editors: Upa Lalremthang Biete, Mr. H. T. Vela
Members: Rev. Mangsawiluoi, Mr. V. L. Rawna

Thalai Kantu Magazine hi hun iemanichena inthawk khan suk suok zawm thei ta loin a uma. Ṭhuoitu hmasa haiin bul anlo ṭan vui liem sawng el chu inpam um tiin General Conference vawi-38 na Resolution no. 11na. chun Ṭhalâi Kantu hi quarterly E-Bulettin a buotsai nisien, YCO inrawina hnuoia suk suok nawk nisien a ti angin thlathum dan peia buotsai nâwk a nia, nisienlakhawm digital khawvel um ei ni ta leiin thlathum dan peia ṭhalai rawngbawlna e-bulletina insuo chu ṭhalai hai buṭhing infak tir ang a hung ni tah. General Conference Vawi-39 resolution no. 6na chun “Ṭhalâi Kantu hi Facebook page le Instagram page a buotsai lem nisien” a ti angin 2023 a inthawkin Facebook page le Instagram page hmangin thlâk a lo ni tah.

2. RAW BIL PROJECT (BAMBOO PLANTATION)

Bamboo Plantation Project khawm hi Pathienin danglam taka a mi buotsai pêk a nih. K. Bethel khuoa ei kohranhai Pathienin a hung hmang a; chu zâr pei chun khawtlâng ṭhuoituhai kuomah Lalpa’n thu a lo hril pei a. Pu Hmangselthang, Chief of K. Bethel fethlengin a thlâwn lieu lieuin ram lien tâwk takel Pathienin a mi pêk a nih. Tuiruong (Barak) vadung kâwl ela um a nih a. Fing thum zeta lien a nih a (30 acres vêl anga ngai a nih). Tuhin Ruo (a lien chi le paper mill ruo bik) bul 3000 ei phun tah a, Pathien zâr chauin bul 2000 bêk chu hring ngei ngei dingin ei beisei a nih. Tu ang huna hin a tlâwm takah pum khat peiah Rs. 50/-a zawr a nih a. Bul khatah kung 50 chau khawm lo um sienla, bul 2000 a chun kung 100, 000 a um thei dinga beisei a ni lai zingin marketing tiengah harsatna a um tâk leiin CKṬP Committee chun a ṭul ang peia hmathar la pei lem dinga bawzui mêk a nih.

Bamboo Project committee hmasatakhai

Chairman: Rev. Zothanghrim
Secretary: Pastor Laldinglien
Members:
Upa Thawna, Tuisuolien
Pu Chawngsellien, K. Bethel
Pu Lalngaisang, K. Bethel 
Pu Hmangselthang, Chief of K. Bethel
Pu Chanchinmawi, Tuisuolien
Rev. H. P Runremthang, YCO

3. THALAI IN

Biel pumpui ena ân lailungna laitak Hmarkhawliena hin rawngbâwlna ding centre pakhat nei inla, a hming ding khawma thil dang hmang loin ṬHALAI IN ni sien tia vision lo um chu Gospel Centenary lâwm kum tak 2010 November 3 khan Hmarkhawlien ah chêng nuoi nga (Rs. 500, 000) a inchâwk a nih. A lienzie chu a khang 100ft le a dung 148ft a nih. Silchar Railway Station-a inthawk Km 30 vêl chaua hla a nih a; Kumbigram Airport a inthawk khawma Km 20 vêl chaua hla a nih. Lamlien (National Highway-53) khawmin a hraw thleng bawk a; Tuiruong (Barak River) bul ela um a ni bawk.

February 4, 2012 khan Rev. Dr. J. L Songate-in Lungphûm (foundation stone) a phûm a; October 15, 2014 khan Rev. H. P. Runremthang, Youth Co-Ordinator-in In bâwl ṭanna ding Ban (pillar) hmasatak a phun. ṬHALAI IN rawngbâwlna dinga Pathien thu (Bible châng) innghatna chu “Kut kaithlahai chu dawmkâng unla, khûp zawihai chu  sukhrât ro; kebai chu sukpelsawl loa, sukdama a um lemna dingin, in kehai ta dingin lampui tlûnhai siem ro” (Heb. 12:12, 13) hi a nih.

38th General Conference, 2022 resolution no. 5na chun ‘Ṭhalai in hnunga hmun inchâwk ni sien’ ti thu hi bawzuina nei a nia, tarik 23 April, 2022 (Saturday) ni hin ramneitu Pu Gideon Lalthomlien Neitham kuoma inthawkin Ṭhalai In hnunga ram khata 6 chêng nuoi nga (Rs. 500, 000. 00) a inchâwk a nia, a man khawm sumfaiin pêk fel nghal a nih. A ram neitu, Pu Lalthomlien hin khata khat, chêng nuoi khat man Thalai in a dingin a hung donate el bakak Rs. 10, 000 (sîng khat) Central Committee hai kalman ding tiin a hung pêk a nih.

ṬHALAI IN hi Ṭhalaihaiin ei rem hriet dân dân hmangin ei enkawl zing a, duthusamin enkawl zonaw inlakhawm ei kuta um, ei mawphurna a ni el bâkah ṭhalai rawngbâwlna hmangruo dinga induong le bâwl a ni leiin a ṭul ang peia enkawl le sukhmasâwn pei ei tum leiin Central KṬP sum hmanga enkawl zing a nih.

(i) HMANGNA DING:

  • Discipleship Training Centre
  • Vocational Music training Centre
  • Handicraft Training Centre
  • Guest Room
  • Camp/Crusade and Retreat centre
  • Prayer/Paniel centre
  • CKṬP-in hmang a phal pêkhai

(ii) ENKAWL DAN DING:

  • Spiritual (2 Tim. 3:16)
  • Physical (1 Tim. 4:10)
  • Medical (1 Tim. 5:23)
  • Sports (1 Tim. 4:8)
  • Music (1 Sam. 16:23)
  • Prayer (Thil. 12:5)
  • Outreach (2 Kor. 5:15)

(iii) SAMARITAN DONATION BOX :

Pathien rama ei rawngbâwlnaa hin thlarau chau niloin taksaa la um eini a, pawimaw le ṭul tamtak a um hlak leiin ringtuhai hin thilpêk hmangin rawng ei bâwl zing a ṭul a;Chuleiin, mi tuel khawmin ṭhalai rawngbâwlnaa ṭhang nuom taphawt haiin taksa le thlaraua damnaw le chau hai enkawl le sansuokna dingin, Samari miṭha-in thilpêk hmanga sawmdâwlna sin a thaw ang khan, thilpêk hmanga rawngbâwlna kawt zalêntaka hawngin ṬHALAI IN ah Samaritan Donation Box sie zing a nih.

(IV) ṬHALAI IN ENKAWLTU:

Central Committee Sitting No. 112, Resolution No. 6na chun Central Executive Committee kutah   sie a lo nia, amiruokchu Ṭhalai In hi thei ang anga building hai khawm la bâwl sap pei dinga plan um a ni leiin, sin a hrat lem theina ding a ni chun Execuitve committe’n  ṭul a ti chun  Sub. Committee siem thei a tih.

(V) ṬHALAI IN CARETAKER:

ṬHALAI IN ENKAWLTU (CARETAKER) LÂK DÂN DING LE A SIN BIK DING HAI:

1. THUNEITU:

Ṭhalai Ina rawngbâwltu ding lâk le bân thuah General Conference phalna-in Central committee-in lain bân thei a tih, bawzui ṭul a lo um chun Central Committee in hmalain bawzui a ta General Conference hmasatakah intlun a tih.

2. THAWKTU RUOI DÂN:

  1. Ṭhalai In a rawngbâwlna sin chu voluntary (mani inpêkna) a thaw a ni hri phawt leiin thawktu/rawngbâwltu dinga ruoi hai hrim hrim chu Temporary/Contract a ruoi ning an tih. Amiruokchu, rawngbâwlna pawimaw le thienghlim a ni leiin rawngbâwltu ding chu uluk taka en a ruoi ning a tih.
  2. Ṭhalai In enkawltu sin thawa rawngbâwltu chu sin nghetlo (Temporary) nisienkhawm rawngbâwlna pawimaw em em a ni leiin, thawktu lâkna chungchânga interview a fethlêng ngei ding a nih.
  3. Ṭhalai Ina thawktu chu sin nghetlo (Temporary) ani leiin, kum thum (3) a ding peiin lâk/ruoi ning a ta, kum thum dân pei a ennawn ni hlak a tih.

3. THAWKTU HLAW:

Thawktu hlaw chu Central Committee in âwm ati ang tâwk peiin bituk siem a ta, General Conference a intlun a tih.

4. A SIN DING HAI (WORK ALLOTMENT):

  1. Ṭhalai Ina hunghai lo lâwmlutin registerah an hminghai inziek luttirin ṭhatakin enkawl a tih.
  2. Ṭhalai Ina building le roomhai bâkah compound fai le thienghlim taka enkawl.
  3. Rawngbâwltu inzinhai le khuolzin mihai taksa tienga an hadamna ding le Thlarau tieng khawm châkkhâi an lâk theina ding khawma Ṭhalai In hi ti a ni leiin, mikhuolhai ta dinga nghawkum thei ding laka Ṭhalai In le Compound enkai a tih.
  4. Ṭhalai ina hunghaiṬhalai in dânhai lo hril hlak a tih.
  5. Ṭhalai In-ah thuomhnaw (property) hai Inventory list ṭha takin siem a ta, chun thuomhnaw hung petuhai le an thilpêk le an pêkni ṭhatakin record siem a tih.
  6. Ṭhalai In-ah nikhat programme hmang dinghai chu YCO leh inhrepawin remtina pe thei a tih. Amiruokchu, Camp/Crusade/retreat le programme dang dang hmang nuomhai chun an hmatieng hnina lekha siemin an khâina  Executive Committee kuomah intlun a tih.
  7. Programme record book siem a ta, programme hung nei hai hrim hrim an programme hmang dân le a tarik hai a record vawng ding a nih.
  8. Ṭhalai In thawktu chu emergency/ ṭulna leia a sin ni nga(5) neka sâwt a thawthei naw ding a ni chun an khâina committee ah intlun a tih.

5. SUM THU:

Ṭhalai in ah sum lut hrim hrim, Good Samaritan Donation, Gift, Guest House a riek man etc. hai chu Account book neiin ṭhatakin enkawl a ta, Central Finance Secretary kutah submit hlak a tih.

6. DISCIPLINE:

Ṭhalai In enkawltu chu mi piengthar, Kristien nun dân mawi le thienghlim taka um a ni ding a nih:

  1. Kohran dân le khawtlâng dânin a khap thilhai thaw or ching mi a ni ding an nawh.
  2. Hâwp le hmuom, inruithei thaw hlak mi a ni ding a ni nawh.
  3. Kohran dân kal zâwnga khawsa le Kristien nun dân ding lo ang taka thil a thaw/khawsa chun a sin a inthawk ieng huna khawm inchâwltir thei ning a tih.

7. Ṭhalai In enkawltu lâk dân le a sin dinga siemhai hi General Conference in ṭul a ti ang peiin sukdanglam thei a tih.