Ṭhalaihai hin Central, Presbytery le Unit levela inenkawlna ding sumhnâr ei nei thlap a; chuonghai chu hienghai hi an nih:
ONE DAY FOR CHRIST
Ṭhalai ta dinga General Fund chu One Day for Christ (ODC) hi a nih a; kum 2002 Rengkai khuoa General Conference vawi 19-na, Resolution 7-nain a rêl a nih.
(i) A hung inṭan dân: Ṭhalaihaiin sum thuah harsatna nasatak ei tuok a, thawktu (YCO) hlaw khawm pe thei loin ei um a; biel dangah ṭhalai inkhawmpui lien innghat tum inla khawm Gen. Assembly le inkawp naw chun ei nei thei der nawh. Chu harsatna ituom vel beidawng chun NPT tlângah bungheiin ṭawngṭaina nei a nih. A zinga chun Moirang Mantak a inkhawmpui fena lampuiah, Bus a chuong lai takin “Ṭhalaihai hi in motto-ah KRISTA TA DINGA ṬHALAI in tih an naw? In motto hre zingin kum khat (ni 365) sunga nikhat tha chau hi Krista ta dingin pe unla, iengleiin am tlasam hlak in ta?” tia inhriettirna dawng a nih a. Chu dungzui chun ONE DAY for CHRIST hi a hung inṭan a; kum 2002 a inthawk khan “ṭhalai hming ziek taphawt chun an pek ngei ngei ding” tia sumhnâr lien taka nei ṭan a nih. A hming khawm hi a mawi a, a lam tawi O.D.C ti khawm hi a mawi êm êm a nih. YOUTH for CHRIST ti le ONE DAY for CHRIST ti khawm chu a hung inzawm thlap a nih. Ziek dân thua khawm ONE DAY ti le CHRIST ti hi hawrawppuia ziek ning a ta, ‘for’ ti tak hi chu hawrawptea ziek hlak ding a nih.
(ii) An nghatna bible châng (key verse): ODC innghatna Pathien thu chu “Ka chunga a thil thaw ṭhat po po hi Lalpa kuomah ieng am pe ve thung ka tih aw?” Sam 116:12 ti hi a nih.
(iii) Pêk dân ding:
- ‘For Christ’ ti a ni angin, a chunga Bible châng khi hre zingin Krista tuorna en zinga pêk ding a nih.
- Kumtin mani nikhat hlaw indiktak pêk ding a nih.
- A ngamtu ta ding chun nikhat nêka tam khawm pêk thei a nih.
- Ṭhalai member chau naw khawma pêk thei a nih.
(iv) Hmangna ding: Ṭhalai General Fund a ni leiin General Conference in hmang dinga a rêlna hmun peiah hmang ding a nih.
(v) A thil tum: ODC hin sum pêk râwn ringawt a buoipui nawh a, ei motto angin – Krista hmangaia, a ta dinga inpêkna nun ei nei hi a thiltum tak a nih. Entirna dingin: Nuhmeite Vanlalhriet @ Matu (hi lekha ziek hun 2016 hin chu nunghak ni tain, B.Sc. (Hons) a thaw tah) chu kum 5 mi chau a ni laiin a nu kuomah ODC umzie ân dawn a. A nuin a hang hrilfie hnung chun a nu kuomah Rs. 4/- hi a hung pêk a, “Nu, two days a ni kha aw; 365 days a one day chau chu a tlâwm êm el” a tih a. A nu chun “Bawi, khawlai pawisa am i nei leh, hlaw khawm la nei lo che a” a tih a. Matu chun, “Nu, ni tin ka fâk thei man dingin Rs. 2/- i mi pêk zie a, ni hni sung hi chu iengkhawm fâk thei fa dâl ka tih’ ka tih a, two days ka hung pêk a ni kha” a ti a nih. Chu thu chu a nuin a hril ṭum chun mitthli tla pumin a hril a nih. A ngaithlatu khawm a mitthli a parawl kuong el! Rs. 4/- chu a tam êm a, a pêk râwn leia lâwm ringawt an nawh a, naupang kum 5 mi chauin Krista hmangaina lei chaua ni hni sung mani fâk ai pe a, a tuorpui ngamna lungril le inpêkna khan mitthli a suk tla a nih. Chu chu Pathien lâwm zawng a na; ODC thiltum khawm a nih.
Tirko Paula chu Rom lunginah ân tâng a, Philippi kohranhaiin Epaphrodita tirin pawisa an zu pêk a. Paula chun an thilpêk chau chu a lâwmna a ni nawh a, “Ka lunginzingnaa in mi lunginzingpui hi ka lâwm a nih” a tih a; “Thilpêk chu zawng ka ni nawh a, ra nangni tienga pung ding chu ka zawng lem a nih” (Phil. 4:14, 17) a ti bawk a. Chuong ang tak chun ODC hin sum le pai chau a beisei an nawh a, Krista hmangaina lungril ei nei hi a mi nuompuitak a nih. Tulai hin nikhat hlaw indiktak pe loa, ‘ngam tawk’ pe ei tam hle a, a pawi takzet a nih. Pathienin ei damna dingin a thil nei laia hlutak, ‘a ṭhen’ chau khawm ni lo, a rêngin a mi pêk vawng a; chuong lai zinga einin kum khat (365 days) laia nikhat hlaw chau khawm pe ngam lo a, ‘ngam tâwk’ ei la hang pêk hi chu Pathien lungril a na ding a nih. Ei motto a chun KRISTA TA DINGA ṬHALAI ti a nih a; chu dungzui pei chun thilpêk kawngah Krista ta ding ṭhalai ei nizie suklangna dingin ṭhalai member taphawtin ei nikhat hlaw indiktak seng ei pêk ding a nih. Chu chu mimal tinin Centrala ei target chu a nih.
Tuta ei member tam dân enin ei nikhat hlaw hi a tlâwm tienga chawk ruolin Rs. 300 seng khawmin lo pe seng in la kumtin 20-30 lakh ei hmu zie ding a na, hieng ang dungzui hin Presbytery/Field/City Church/unit tinin ODC Budget khawm hi siem thei seng inla ṭha hleng a tih.
FAITHAM
Faiṭhâm hi September 22, 1961 ânthawk khan Tuiṭhaphai Presbytery sungah lo nei ṭan a ni tah a. Kohranpuiin Faiṭham a nei ang êma rik a ni naw lai zingin ṭhalaihaiin an hlâwkpui hle a. Chuleiin, biel pumpuia hmang ve dingin General Conference-ah putlût a nih a. Chu dungzui pei chun kum 2005, Hmarkhawlien Gen. Conference vawi 22-na, resolution 9-nain biel pumpuia hmang dingin a rêl tah a nih.
(i) A umzie le hmang dân ding: Presbytery tinhai inenkawlna dinga sumhnâr a nih. Chu umzie chu – Faiṭhâm hi unit thaw ding chu a nih a; sienkhawm, Presbytery Conference in unit chanpuol ding a parcent a sie thlâk a ni ngawt naw chun hmu ang ang chu Presbytery a lût vawng ding a nih. Chuong a ni lei ringawt chun unitin a ṭangkaipui lo ding sum ni loin, ‘Presbytery-a an target tlâkna dinga an sumhnâr’ a nih.
KTP DAY THAWLÂWM
Central KṬP hi a hming lien deuin um sien khawm, sum thuah harsatna nasatak a tuok hlak leiin KṬP Day thawlâwm hi Presbytery fethlengin centralah submit pei ni ta raw se tiin. Kum 2015 KṬP Genenral Conference 31-na, resolution 11-na, Sakawrdai khuoa chun a lo rêl tah a nih. Chuleiin, KṬP Daya thawlâwm ṭumkhat ei I dâwl chu centralah submit pei ding a nih.
THLA THAR THAWLÂWM
Ṭhalai inkhâwmnaah thla thar inkhâwm hmasa tak ṭuma thawlâwm hi ‘Thla thar thawlâwm’ ti ni sien la; chu thawlâwm chu Presbytery ta ding ni raw se’ tiin Hmarkhawlien khuoah kum 2005, Gen. Conference vawi 22-na, resolution 9-na chun a rêl taa nih. Chuleiin, unit tin haiin nasataka ṭhang la a Pathien ram lienna dingin thlathar thawlâwm dâwl uor seng ding a nih.
BIRTHDAY GIFT
Mi tukhawmin a piengchampha (birthday) a tlung phaleh Pathien kuomah lawmthu hrilna thilpêk a pêk hlak ding a nih. Amiruokchu, hi thilpêk pêkna kawnga hin tukhawm inphutluina um chuong loin Pathien ṭhuoina zâra Pieng champha (Birthday) tlung theia a um leia Ṭhalai rawngbâwlna dinga thilpêk pe nuomtuhai ta ding bika rawngbâwlna kawt lientak inhawng zing chu a nih. A thei phawt chun KṬP member taphawt chun Pathien kuoma lâwmthu hrilna dingin a pêk ngei ngei dinga beisei a nih. (2019 Ṭhalai General Conference Resolution no. 6 na chun “Birthday Gift Designated Fund a um hi General Fund ah um ta sien kan tih” tia rêla lo um angin Birthday Gift sum po po chu Designated Fund ni ta lovin General Fund ah a lût vawng an tah.)
SUM FE DAN
Sumhnâr tum tumhai hin fena bik an nei seng a, unit chun ama remhriet dân tum tum hmanga a sum hmu po po chu unitah lût vawng a ta; thla Thar thawlâwm le Faiṭham ruok chu presbytery-ah a submit pei ding a nih. ODC, KṬP Day thawlâwm le, Birthday Gift hai hi Presbytery fethlenga hmu ang ang chu centralah a submit vawng ding a nih.
Hitaka inthawka ei hriet ding chu – central le presbytery level a target (sum zât bituk) ei insiemhai hi thahrui siemtu ang chau a na, ‘central target’ ei ti chun, sum bituk zât nêkin, member po poin ODC an pêk kim seng ku kha ‘central target’ chu a ni lem. Presbytery target’ ei ti khawma Faiṭhâm le Sumhnâr dang dang ei hmusuok hai hmanga ei hmusuok ding a ni bawk.