Liem tah August 31 – September 1, 2024 sûng khan CKṬP hmalaknain Aizawl, Hmarphei le Tuivai Presbytery KṬP Joint Leaders’ Meet Sesawng, Mizorama malsâwmna tamtak leh hmang a nih.
Meet-a hin KṬP member 170 – Aizawl Presbytery a’nthawk 64, Hmarphei Presbytery a’nthawk 76, Tuivai Presbytery a’nthawk 30 – an ṭhang thei a, CKṬP a’nthawk Rev. Lalrohlu, Chairman le Pu Ebenezar R. Sinate, Secretary an ṭhang bawk.
Rev. Thangngur Music Awardees Nk. Grace Ramhlukim le Nk. Lalrinhlu Infimate hai bâkah Aizawl Presbytery Choir, Hmarphei Presbytery Choir le Tuivai Presbytery Choir haiin hla sakin rawngbâwlna an nei.
Inrinni sûn khan KṬP Inṭhuoi Dân (Administration) le KṬP Projects thua inhrilhrietna Pu Ebenezar R. Sinate in a nei a, ṭhalaihaiin an hriet naw tamtak an hriet thar a, an hlâwkpui hle. Rev. Lalrohlu a’nthawk ‘Ṭhuoitu Inpumpêkna‘ ti thupuia hmangin Pathien thu ropui tak le ṭhuoitu um dân ding ṭha tak tak ngaithlak a ni bawk.
Pathienni sûn dâr 1:30 PM-in Fellowship nei a ni a, thu le hlaa inpâwltlângna neiin, soloist le request um hai a’nthawk hla mawi tak tak ngaithlak a ni bâkah Presbytery tina Secretary hai a’nthawk rawngbâwlna le hmalâk dân tlângpui report ngaithlak a nih.
Hun dang po, Inrinni zân, Pathienni zîng le zân chu mipui inkhâwm Worship Service-a hmang a ni a, Rev. Lalrohlu a’nthawk Pathien thu ropui tak tak ngaithlak a nih.
Rev. Evan John, YCO, programme-a ṭhang dinga induong ni sien khawm, damnawna leiin a ṭhang thei ta naw leiin a chanvo po chu CKṬP Secretary le Chairman-in an insem lem el ta a nih.
Ṭhalai fekhawmhaiin hi MEET hi an hlâwkpuiin, malsâwmna tam tak an dawng thu hrilin, thaw rawp chi niin an hriet.
Reports & Photos: Alberta Nungate, CKṬP Media Ministry Team Member
Very fantastic visual appeal on this site, I’d rate it 10 10.