ICI Central Choir Bus Inhlanna le Lawmna

ICI Central Choir Bus chu August 28, 2025 dâr 3:00 PM khan Sielmat ICI Fellowship Hall-ah Pathien kuoma inhlânna le lâwmna programme phuisui taka hmang a nih. Bus nei dân Rev. Evan John, YCO-in hrilna a nei a, Rev. Lalneikhup Hmar, Executive Secretary-in rawngbâwlna dinga pêksuokna le Pathien kuoma inhlânna a nei.

ICI Central Choir Bus Project hi kum 2013 lâi dai a’nthawka Central Choir hmalâknaa lo ṭan a ni ta a. KṬP General Conference vawi 38-na (2022 @ Rengkai)-in a rêl angin, Central KṬP hmalâknain biel pum huopin hi project hi sukpuitling dinga hma lâk thar nawk a nih.

Hi project puitlingna ding hin Banquet dâm, Mimal intiemna dâm, Conference thawlâwm dâwlna dâm neiin, KṬP member tin mi lukipah Rs. 100 bituk siem a ni bawk a. Amiruokchu kum 2023-a Manipur buoina hung suok leiin beisei angin hma lâk sunzawm thei a ni ta naw a. Project sum um ta po Rs. 20 Lakhs chu, Central Committee Sitting No. 123 (2024) thurêl dungzuiin, Executive Secretary kuoma pe lûtin, Central Chois Bus chu kohran nu-le-pa hai mi ngaituopêk el dinga intlun a hung ni ta a nih.

Executive Council vawi 171-na (March 2025) fethlenga ICI Secretariat hmalâkna zârin Central Choir Bus chu June 4, 2025 khan inchâwk a lo ni ta a. Hi ni hin man inhlanna hunser hmang a ni nghe nghe.

Bus inchâwka um chu rawngbâwlnaa hmang dingin ṭûl le mamaw (accessories) tam tak a la um a. August 2025 thla sûng khan chuong chu – Roof rack (bus chunga thuomhnaw siena), tyre lien, bumper guard, music system, side guard, light le thil dang dang hai bâkah, a phuta mi 24 chau chuong theina (24 seater) chu mi 29 chuong thei ta dingin ṭhungna hai Guwahati-a insiemtir a nih. Hieng hai hi siem zo a ni le inruolin a lâwmna programme hi CKṬP-in a huoihawt a nih.

Central Choir Bus hmang dân ding felfai tak el ICI Secretariat le CKṬP ṭhuoituhaiin an buotsai dân dungzuiin, Bus hi Central Choir-in rawngbâwlna le a ṭûlna naa an hmang ding a ni a; an hmang naw kâr lakah kohranin a ṭûlnaa hai hmang thei bawk a tih. Enkawl ṭûl zing a ni leiin, maintenance chungthuah Secretariat enkawlna hnuoia sie a ni bawk.

Bus lâwmnaa hunser hi Pu Lalnunmawi Zote, Committee Member, KṬP Central Committee-in a ṭhuoi a, Rev. Lalrohlu (Secretary, Ministries), Upa Ramhlunsang (Chairman, Central Choir), Pastor Varsanglur (Choir Member hlui), Pastor Zothanghrim (Choir Conductor hlui le Bus Project ṭan laia ṭhuoitu) le Rev. V. Ramchuoilo Varte (1^st Batch, Central Choir) hai a’nthawk thu lâwmum tak tak ngaithlak a ni a, Central Choir haiin Pathien inpâkna hla ropui tak el an sak bawk. Bus lâwmnaa hin ICI ICI Central Choir member hai, Secretariat le Tuiṭhaphai Presbytery Staff hai, KṬP Central Committee member hai, Tuiṭhaphaia Pastor hai, Tuiṭhaphai Presbytery KṬP Committee member hai, RWUS Staff hai, CKṬP Media Ministry Team, Sielmat Local Committee member hai le Sielmat KṬP Unit office bearers hai an ṭhang. Lâwmna ruoi Secretariat-in a buotsai chu hlim taka kîltlâng a nih.

Click on the image to enlarge. More photos: Google Drive