Independent Church of India, Kristien Thalai Pâwlai hi Pathien kuthrât thuoina le umpuina zâr chauin biel pum huopin Kum 1981 lai dai a’n thawk khan ei lo ngîr tan ta a.Sienkhawm, Krista thisena inzawmkhâwmna le Kohran pakhat ei nina zâra sinthaw tlâng ei nina ngâwt naw chu; inzawmkhâwmna mumal tak ke kallhmang tha tak induong khawm ei nei hran nawh a. Chuongtlai zing kum 2000 ei hung chuongkai meu khan chu kum sâwm sunga thil ei thaw dinghai rirongna (Ten Year Plan) neih; Pathienni ei Plan chu mi hrepum mal a mi sâwmpek a, hmasâwnna sirbi thar remani zâtah a mi hlângkai chau nilo; biel pum huopa activities chi dang dang thaw tlâng ding khawm iemani zât induong suok a ni bawk. Chu le inzawm chun Kum 2007 lai khan Rev. H.P.Runremthang, YCO a nina angin KṬPin ei pawimâw le ṭul êm êm KṬP REFERENCE a mi lo buotsaipêk a, ei lâwm hle a nih. Chulaizing chun, activities chi tum tum ei hung neisa/belsa pei ta lein siemthat ṭul le belsa ṭul tam tak a hung um tak lein Central Committee Sitting No.98, Resolution No.10 chun “KṬP REFERENCE chu revise & enlarge thaw a, KṬP HANDBOOK-a siem ni raw se” tia a lo rêl angin biel tinah lo en fel a, siemthat ṭulhai lo siemtha ve dingin a copy thawin darin, KṬP Handbook chu siemzoin ei lo hmang zing ta a nih.
Amiruo̱khu, thalaihai hi engkima hmasâwn zing le inthang zing ei ni angin siemthat ding le belsa ding ṭul a um nâwk ta rawp lein Kum 2021, Thalai General Conference vawi 37, Resolution No.5na chun “KṬP HANDBOOK hi ennawn a siemthat ṭulhai siemṭhain belsa ṭulhai belsa ni raw seh” tia a lo rêl angin Central Committee Sitting No.112, Resolution No.4na chun hma hung lain Executive Committee hung bâwzui dinga a pêk angin Central Executive Committee Sitting No.252, Resolution No.3na chun siemthat ṭulhai siemtha dinga mâwpurna a pêkhaiin hun intêp tak kârah thei tâwpa hma hung lain Pathien thuoina zâra zofel theia an um ta lein a Bu hmu theia a um ta hi lâwmvum ei ti tak zet a nih.
Khawvêl danglam zinga um ei ni lein siemthat ṭul le belsa ṭul a umpei lein 2024 KṬP General Conference vawi 40na, Resolution No.4 na chun “KṬP Handbook hi review ni sien ti na rêl a”.. Central Committee bâwzui dinga pêk a ni angin, Central Committee sitting no.122, Resolution No.2 na chun review thawtu ding a ruot a, ruota um hmaiin theitâwpa hma hung lain a sunga thu umhai a rênga siemrem thar wawngin, bel thar le pei khawm iemanizât nei a nih.
A tâwp taka ding chun, KṬP Inthuoi dân (Bye-law) le KṬP Handbook hi thalaihai mi keithuoitu le mi vêngtu hmang tangkai tum seng ei tiû. Thalaihai ei rawngbâwl tlângna dinga hei lekhabu sunga ei hlûlût hai po po hi Pathien ropuina dinga supkutpling a ni theina ding le rawngbâwlna kawngah hmasâwnna thar mi petu a ni ngei theina dingin Pathien kuomah ei inhlân a nih.