Central KṬP le Jiribam Presbytery KṬP inhrepawin Leaders Meet & Retreat May 30 – June 1, 2025 sûng khan Tuisuoliena hlawtling taka hmang a nih. Hi huna hin Main Speaker chu Rev. Evan John, YCO a ni a; ama hin Zirtawpni zan, Inrinni zing, Pathienni zing le zana hai thuhrilna a nei. Rev. Lalsuokhup, PS-in Inrinni zan thuhrilna a nei bawk.
Inrinni zingkar le Pathienni zingkar devotion YCO-in a ṭhuoi a; Inrinni sûn hunah Pathien Thu le Hlaa inpâwlkhawmna nei a ni bawk a, ṭhalai haiin Pathien Thu an hriet nuom hai indawnna hun hmang a nih.
Pathienni sûn huna hin KṬP rawngbawlna hai inhrilhrietna nei a ni a. Ṭhuoitu mawphurna, Unit le Presbytery KṬP Committe sin ding hai, ṭhalai inkhawm ngaisak lo, ṭhalaia active lo hai chunga ṭhalai haiin mawphurna ei nei zie dam uor taka inhril a nih. Central KṬP hmalakna dâm, ODC le Birthday Gift ei hmangna hai dâm ngaithlak a ni bawk. Nk. Lalrinpui Inbuon a’nthawk inpakna hla ngaithlak a nih.
Leaders Meet & Retreat sûng hin Presbytery KṬP-in Rev. Thangngur Music Awardee Nk. Lalhmunmawi le Nk. Lily Lalparmawi a fiel ang taka an hung ṭhang leiin lawm um a ti hle a, inkhawm zatin hla sakin, rawngbawlna an nei.
Common Mess buotsai a ni a, fak le dawn khawm a hnienghnar hle. Pathienni tûk ti lo po chu ruoi ṭhe ang ngawta fak le dawn buotsai a nih. Inrinni zantieng hin Tuisuolien Local-in vawksa ruoi an ṭhe a, Pathienni zantieng hin PKṬP-in bawng chal thatin, mikhuol hai fak ding ruoi a ṭhe.
Hi programme hmangna dinga sumfaia ṭhangpuina petu, a hnuoia suklang hai chunga hin, PKṬP chu a lawm hle:
1. PS Office: Rs. 20,000
2. Presbytery Development Board: Rs. 10,000
3. Central KṬP: Rs. 10,000
4. Presbytery KṬP: Rs. 20,000
5. Tv. Chalruolsung, Chairman JPKṬP: Rs. 22,000
6. Pu C.L Robert, Secretary JPKṬP: Rs 6,000
7. Others: Rs. 1900
Worship Service haiah Pastor Lalbuotsai le Pastor Hranghminglien Varte haiin inkhawm an keihruoi a, Buthangkhal Unit, B. Huonveng Unit le Tuisuolien Unit KṬP haiin hlapawl an sak bawk.
Meet ṭan zân Pu C.L Robert, Secretary JPKṬP-in introduction le lawmlutna a nei a, a tâwp zanah Tuisuolien Local aiin Upa Thawna-in hun a hmang a, Tv. Chalruolsung, Chairman JPKṬP-in lawmthu hrilna a nei bawk.
Buthangkhal, B. Huonveng le K. Bethel unit hai iemani zat inlanin an ṭhang a, Pathienni zan chu mikhuol 120 vela hisap a nih.
Jiribam Presbytery-a hin inkhawmpuia rieklut le programme hmanga rieklut hai hi COVID le Manipur ram buoi lei hin a vâng ta khawp el a, hieng anga programme hmang a ni hin, ṭhalai hai lai inngainattharna dâm a pung a, kan hlawkpui hle.
Pathien Thu sermon a’nthawk le hlasakna hai le Pathienni sûn ṭhalai rawngbawlna inhrilhrietna a’nthawk hin ṭhalai haiin malsawmna tamtak an dawng a, an lawm hle a nih.
Hieng ang programme kan hmang theina dinga kan ngenna ang taka CKṬP-in a mi bawzui pek leiin kan lawm hle.
Raw sûr nasat leiin inkhawm a sukbuoi zeu zeu a, tuiruong nasatakin a’n ṭhang a, khuo le khuo infepawna tamtak lampui hai tuiin a chîm pil a, chu kara khawm chun mani khuo le vêng dam takin kan tlung thei.
Report:
Chalruolsung
CKṬP Media Ministry Correspondent
Jiribam Presbytery
