41st KTP General Conference Report

ICI Kristien Ṭhalai Pâwl inkhâwmpui lien vawi 41-nâ (Rorêl Inkhâwmpui), Meghalaya West Presbytery-a unit pahni, Madanrting le Sub-Hqtrs., Shillong-a innghat chu April 04 – 06, 2025 sûng khan malsâwmna tam tak leh hmang zo a lo ni tah.

Presbytery dang danga inthawkin mikhuol hi 250 bâwr fê khâwm a ni a, mikhuol tam lem chu April 03, 2025, Ningâni khan an tlung a, Presbytery/City Church ṭhenkhat April 04, 2025, Zirtâwpnia tlung khawm an um nuol tho a nih.

Inkhâwm (Worship Service) hi Madanrting biek in tienga nêi a ni a, Rorêlna hun hi ICI Sub -Hqtrs, Shillong biek ina nei a nih.

Ṭum danga la tlung zen zen ngai lo, tu tâ ṭum inkhâwmpui hi Independent Kohran Founding Day (ICI Day of Prayer), April ni 04 (Zirtâwpnî ) leh a’n tuok leiin hmang sâ nghâl a ni a, hî zân hin KṬP hlapui ‘Lal Iengkim Thawthei‘ tî sak zoin Rev. Dr. James R. Ruolngul, Secretary Ministries ICI-in Conference hawng ṭawngṭaina hun a hmang. Mipui, biek in sip deu hmurin ICI Hlapui, ‘Independent Memorial‘ an hang sak dup dup kha chu a ropui hlê. Rev. H.B. Hluothang, Moderator ICI a’n thawkin inhmâ lâi hun le tû lâi huna ICI kohran ngîrhmun khâikhinna thû le Pathien thû ropui tak ngaithlâk a nih.

April 05, Inrinnî hin Sub-Hqtrs. biek inah Rorêlna hun nei a ni a, Presbytery/City hai a’n thawkin palai 149 an ṭhang thei. General Conference kâr laka ei KṬP member chanpui, mi 22 zet el chatuon ram mi lo inlâwisân hai sûnna hun nei a ni a, sûnnâ hun ser le lusûn sungkuo hai ta dinga ṭawngṭaina hun hi Pastor Lalbuotsaiin a hmang a nih.

Rorêla hin resolution 13 thlâk a ni a, chuong lâi chun:

Birthday Gift hi ODC ang bawkin KṬP unit a thâw ṭha tak hai chu lâwmman pêk ta ding. Hi hi General Conference nâwka sem ṭan dingin Central Committee kuta sie a nih.
Kum 5 sûnga General Conference innghatna hmun ding hai lo siem lâwk pei ta ding
tî hai hi a langsâr zuol deu hai an nih.

Rorêl zo hin mikhuol hung hai po po ta dinga ruoi inhnik tak el, inkhâwmpui intlungtu Meghalaya West Presbytery KṬP-in a buotsai chu kîl tlâng a nih.

April ni 5, 2025 Inrinni zân le April ni 06, 2025 Pathiennî sûn le zân hai hin biek in inkhâwm (Worship Service) nei nâwk a ni a, mipui hla sak a hringin, inkhâwm a’n hawi hlê. Conference thupui hmangin Rev. Evan John, Youth Co-ordinator, Rev. Lalrohlu, Chairman CKṬP le Rev. Dr. James R. Ruolngul, Secretary, Ministries hai a’n thawkin sermon ropui tak tak ngâithlâk a nih.

April ni 06, 2025 Pathiennî chawhnung tieng 1:30 PM hin inkhâwmna hun a um sâ bawk a, ‘KṬP Way Forward‘ tî thupuia hmangin Rev. Evan John, YCO-in power-point presentation hun a hmang a, CKṬP hminga rawngbâwlna centre pawimaw êm êm ding Building Project thar ding suklangin, tû laia Ṭhalai hai ngirhmun, inhnik zâwng, inhawi tî zâwng le um nuom zâwng le um dân ṭhenkhat hrilin, Ṭhalai ṭhuoitu hung khâwm hai ta dinga infuina thuchâ ropui tak tak a hril chun lungril a tâwk hlê.

Pu Ramhmangai Khawbung, CKṬP Executive Comm. Member-in ODC le Birthday Gift background study report fie tak le kim chang takin a present a, Pu Ebenezer Sinate, Secretary CKṬP a’n thawkin Statistic report ngaithlâk a ni bawk.

April 06, Pathienni zân inkhâwm hi NEICC General Secretary Rev. Dr. Ramengliana-in a hung uop ve a, Greetings pein hun a hmang a, CKṬP hmingin Mememto inhlân a nih.

KṬP Hand Book-a inziek angin, Ṭhalai Pâwl member hai ta dinga category hran hrana châwimâwina siem dinga ti a ni angin, tuta ṭum inkhâwmpuia hin, Secretary-a report lût angin, a hnuoia mi 3 hai hi chawimawina pêk an nih.

Mr. David Lalhlansânga Hmâr, s/o (L) Pu Lalthanzara, Vairengte ICI Kohran, Serlui Presbytery.

Ama hi Indian Professional Footballer inlâr ṭan mêk a ni a, I – League 2023 -24 khan a club khêlnâ Mohammedan Sporting chu I – League champion puiin ISL khêl dingin an inhlângkai a, a thaw ṭha leiin AIFF Emerging Player of the Year an inhlân.

2023 Durand Cup khan goal thun râwn a ni leii. Golden Boot a dawng a, 2024 – 25 ISL Fan’s Goal of the Week chawimawina pêk a ni bawk. (A chanchin le chawimawina a dawng ta hai chu nakie leh a kim chang lemin KṬP website-a hmu theiin an la sie lem ding a nih.)
Mr. Lalnghatlien Darngawn s/o Mr. Lalmalsawm Darngawn, ICI Sub – Hqrts, Hmarkhawlien, Cachar Presbytery. Ama hi Assam Public Service Commission hnuoiah Assistant Engineer sin inziek tling a nih.
Mr. J. Lalhmahruaia s/o Mr. Lalruatthanga, Phuaibuang, Tuivai Presbytery. Ama hin Mizoram Public Service Commission hnuoiah Mizoram Civil Service a’n ziek tling a nih.

Hun dang ang bawkin Category chi hni lâwmman sem hlak kha a hnuoia hai hi tuta ṭuma dawngtu hai an nih:

ODC pe ṭha tak unit– TALÂN KṬP, Hmârbiel North Presbytery. Talân unit hi member 16 chau an ni a, an rêngin ODC an pêk seng a, ₹ 15,480/- lâi an pêk phâk a, mi pakhatin ₹ 967/- a pêk phâk tîna a nih.
OVER – ALL ACTIVITIES AWARD dawngtu – Meghalaya West Presbytery.

CKṬP Secretary a’n thawkin Statistic report ngâithlâk a nia chu, tuta ṭum inkhâwmpuia inthawka Presbytery tin Common Report form ei hmang thar hi ei la thiempui bêk naw leiin data lâk khâwma um hi a’n dik tak pa a ni naw ding tî a chieng a, ieng po khawm ni sien, report form- a hmu angin a hnuoia hin ṭhenkhat ei hung belsâ a nih.

Member po po zât (2025) – 8,823
Missionary support nei zât – 37
KṬP Day hmang thei unit – 126
KṬP Week hmang thei unit – 117
Unit le Presbytery-a Camp/Crusade nei thei zât – 18
Common subject inchûk thei unit – 104
Theological student (Inchûk mêk) – 56
Tonic Solfa certificate nei member zât (Junior to Diploma) – 220
KṬP unit-a chanchin bu nei zât – 09
Music instruments nei zât.
(a) Keyboard – 64
(b) Drums – 12
(c) Guitar – 56
(d) Bass guitar – 19.
KṬP inkhâwm zâna inkhâwm zât tlangpui (KṬP pumpuia mi) – 2,448
Unit le Presbytery-a project nei zât – 68.
Mission worker thar nei zât – 07

Report hmu angin member tamna tak Presbytery chu Tuiṭhaphai Presbytery a ni a, member 2,195 an um a, a dawttû chu Assam Hills Presbytery niin, member 939 an um a, a pathumna chu Cachar Presbytery niin member 829 an um.

Finance report ruok chu inkhâwmpui chen hin sum a la’n lâwi zing leiin ei zieksâ thei ta naw a nih.

Inkhâwmpui sûng hin Video live coverage thaw a ni a, CKṬP Media Ministry Team a’n thawkin Tv. Richard Sinate, Tv. George Tusing le Pu John William hai an hung a, Meghalaya West Presbytery a’n thawkin Tv. Isak Lalkosuok Joute, Pu Ezra L. Darngawn le Tv. Francis Sanate haiin a ṭûl ang peiin an lo ṭhangpui bawk a, biek in inkhâwm hai sound le video fie deuin hmun danga um hai khawmin ei lo en thei a nih.

Inkhâwm ṭîn zât thingpui buotsai a ni a, April 06, 2025 Pathiennî 11:00 AM inkhâwm ṭîn khan Madanrting ICI kohranin refreshment inhnik tâwk tak an buotsai a, Pathienni zân inkhâwm ṭîn refreshment ruok chu Madanrting kohrana ṭhahnem ngai ṭhenkhatin an nau hai Class X result lâwmnain an buotsai bawk a, zân dang po thingpui chu CKṬP fund hmanga buotsai a nih.

Mikhuol tlung niâ, mânî tlung in pan thei lo le rorêl nia, rorêlna hmun hre lo ṭhenkhat chu inkhâwmpui intlungtu Presbytery sunga KṬP member haiin thei ang angin two-wheeler le car hmangin an thak bawk a nih.

‘Isu Krist Sipai Ṭhâ‘ tî thupuia hmangâ inkhâwmpui programme hlimum tak el chu Rev. Vanlalruot Joute, P.S. Meghalaya West Presbytery-in ṭawngṭaina hun hmangin a lo khâr tah.

Khawvêl thil ṭûl bêk bêk lo hai le inchawk hnawk loin, a’n hawi le a rinuma khawm Lalpa sin ṭhahnem ngai taka thaw zingin, Inkhâwmpui nâwk huna inhmu nâwk sengin KṬP General Conference vawi 41-na chu lo inthla liem phawt ei t’a, inṭhe um nâwk ta lo dingin Lalpa hmun siem vân Jerusalem tharah, Lalpa hun tiem a tlung phâ chun ei la’n tuok khâwm ding a nih. Hmun dang danga um KṬP member po po, Lalpa’n malsâwmin sukhrât pei raw se cheu.

Thlalak thenkhat: Click on image file to enlarge.
All photos: Google Drive