Aizawl Presbytery KTP Sports Meet 2025

Aizawl Presbytery KṬP-in KṬP Week le inzawma Sports Meet nei dinga a lo rêl angin, Thlaphur 23 – 25, 2025 sûng khan Aizawl ICI Biek In, Ramhlun Sports Complex-ah hlawtling taka hmang a nih.

Sports Meet a um ding ti thu Unit tin hai inhriettir an ni a’nthawk kan phûr tlâng hle a. Sports Item chi hrang hrang haia inelna nei a ni ding leiin Unit tin hai inbuotsaina hlimthla Aizawl Presbytery Whatsapp Group-a hung kapkai hlak a ni a. Sports Meet-in a tum tak chu ṭhalai hai taksa le thlaraua malsawmna an dawng theina dinga taksa in-fit lai taka thlarau ruoi tam taka lo inba a, Kohran Kut le Ke ni dinga  ṭhalai hai lo buotsai a nih.

Zirtawpni zân inkhawm ṭan nghal a ni a, Presbytery KṬP Vice Chairman Pu Gospelthang-in lawmlutna hun a hmang a. Member fe kan ṭhahnem hle. KṬP Week le inzawm a ni leiin Week thupui hmangin Upa R. Vanlalawi, Presbytery Chairman-in thuhrilna a nei a. Inkhawm ṭinah Presbytery aiawa Rev. Thangngur Music Award Solo Competition-a ṭhang ding inzawngna Audition Round khatna nei a ni a. Unit pali hai a’nthawk mi pariet inelnaa hin an ṭhang a nih.

Inrinni zîng dar 9-ah Ramhlun Sports Complex Field-ah Sports Meet hawngna Rev. Joseph Malsawmzuol, Presbytery Secretary-in a nei a. Ṭhalai hai, insukhlimna a ni ang taka tukhawm lungsen lo le zaidaw taka inhnel a pawimawzie hai hrilna a nei a, KṬP Hlapui sakin, ṭawngṭaina hmang a ni zovin, inelna ṭan a nih. Inelna hi Football, Volleyball, Relay Race, Hrui inpawt, etc. hai hmanga nei a ni a. Khawmuolin zir bêk naw sien khawm member fekhawm kan ṭhahnemin, inhawi kan ti tlâng hle. Pathien zarin tukhawm insukpal um hriet a ni naw a. Zantieng dar 5:30 velin Pro. Pastor Rohluosang-in Field tieng bîk inhnelna chu a suktawp. Zantieng a tlungtu Unit-in mikhuol hai ta dinga fak a siem chu faktlangna nei a ni bawk.

Zanah Pro. Pastor Rohluosang a’nthawk Week thupui le inzawmin thu ṭha tak el ngaithlak a ni a. Pathienni zing ruok chu Week thupui a um hran naw leiin Pastor H. Lalhmunsiama inthawkin thu ṭha tak tak el ngaithlak a ni a. Inkhawm ṭinin Solo Competition Audition Round thâwk hnina nei a ni nawk bawk.

Pathienni zan hin Week thupui khaikhawmna Rev. Jospeh Malsawmzuol-in a nei a. Ṭhalai hai rawngbawlna kawnga full-time-a inpe ei tlawmzie le ṭhang lak a ngai nasat zie a hril uor hle a. Inkhawm ṭinin Naupang Hall-ah Presbytery KṬP Secretary Pu C. Lalremsang-in lawmman semna a nei a. Inelna hi a hrat ringawt en lovin Discipline en sa a ni a. Overall-a lawmman Pakhatna latu hai chu Sesawng Unit an ni a. Pahnina Aizawl Unit niin, Zemabawk Unit haiin Pathumna an lak bawk a nih.

Rev. Thangngur Music Award inchûna dinga hin Aizawl Presbytery a’nthawk mi pathum thlang suok an ni bawk.

Meet sûng hin Unit tin a’nthawk Hlapawl nei thei seng a ni a, Presbytery Choir hai a’nthawk nei a ni bawk a. Hla sak a’n hawiin tuta ṭum inkhawmpui chu ieng kawng kawnga khawm a boruok a’n hawiin, taksa le thlarau malsawmna a tlung nasa hle. Khawp lo takin Pu Rosangzuol, Presbytery Chairman-in lawmthu hrilna neiin, Presbytery KṬP Conference Sesawnga inhmu nawk ngei dingin Meet a khar.

Report: Fimthangvung
CKṬP Media Ministry Correspondent
Aizawl Presbytery