January 8, 2024, zân tieng dâr 2:30 PM khan ICI CKṬP chun Central Choir member, Vulmawi Award semnaa va ṭhang le Digital Piano inchawa fe mi 6 – Upa Ramhlunsang (Choir Chairman), Pu Samuel Lalhrietsang (Secretary), Pu Diamond Malsawmthang (Conductor), Pu Lalrosiem Thiek (Asst. Conductor), Tv. Matthew Amo le Tv. H.M Johnson – hai chu Sielmat ICI biek in tuola lo tuokin, Fellowship Hall-ah lawmlûtna (welcome ceremony) a lo nei.
Hi programme hi CKṬP Executive Committee member, Central Choir member le Sielmat Local Committee member ṭhenkhatin uopin, Pu Ebenezar R. Sinate, CKṬP Secretary-in a keiṭhuoi a, khuolzin hai lawmlûtna Rev. Lalrohlu, CKṬP Chairman-in a nei.
Choir Conductor le Chairman hai a inthawk inzin report ngâi nuom um tak tak ngâithlâk a ni a; Mizoram mipuihaiin Central Choir rawngbâwlna an hlutsakzie dâm, (L) Pu Buonglienkung hun lai dai a’nthawka ICI Central Choir lo hmêlhriet tah tam tak an um thu report ngâithlâk a ni a. Central Choir ngainatuhai a’nthawk thilpêk hlu tak tak an dawng bâkah, Mizorama an châm sûng hin rawngbawlna dinga an pawimaw êm êm Digital Piano le Acoustic Guitar an inchâwk a, Choir uniform ding khawm an lâk sa nghâl bawk a nih. Aizawl le Lungleia an inzin sûnga kawng dang danga lo ṭawiâwm a, lo dawng sâwngtu Aizawl Presbytey KṬP ṭhuoituhai, PS le tuolsung kohranhai kuomah lâwmthu an hril.
Rev. Lalneikhup Hmar, Executive Secretary-in thu hrilna neiin, Rev. Dr. James R. Ruolngul, Secretary, Ministries-in ṭawngṭaina’n lawmlûtna programme hi a suktâwp.
