CKTP a’nthawk Thlamuongna Thucha

A hmasatakin, hmun tina um Krista ta dinga Ṭhalâi hai, A Lalram tlu sie ngai lo ding ei Lalpa Isu Krista hmingin chibai kan hung buk cheu.

Hun iemani chen liem ta a inthawka India khawpui Delhi le NCR-a ei Ṭhalâi chanpui  HSA-a inziek lût tuma hma la hai, an hmalâkna puitling thei loa um zing pawi ei ti lai zing a, HSA General Headquarters Thu Puong, 24th August, 2025 (No.: HSA/GHQ/CEC/2025/08) in, Krista le A Kohran kalchâwi dân kal a, “Delhi-a Kohran hai hi la ṭhiek/ennawn el dingin ngênna siem ni sien” tia an thurêl an hung suklang, dit naw leia HSA-a mani nina inbân hai po po Pathienin thlamuongin umpui mawl raw se cheu.

Hnama mi siemtu Pathienin ân din (Mt. 16:18), mithi khuo kul kawtkhâr hai khawma an ngam lo, chatuon lungpui Kristaa innghat, ân dintu le a neitu Krista kal zawnga HSA-in hmalâk a tumna dit nawna leia nina pawimaw tak tak le hi pâwl thilthawna hrim hrima la ṭhang naw hri phawt dinga thutlûkna ei siem hi Isu Krista hminga in tuornaah ngai ro aw.

Chu el bakah, vawisuna Kohran leia ei tuorna hai hi ei hnam inphatsanna ân nawh, ei hnam le ram ei hmangaina le siemṭhat tumnaa hmalâkna a ni ti hi hre zing ei tiu. Krista Kohran dodaltu chun a neitu Pathien a doin, a suknawmna a ni si a (Thil. 9:4-6), chuleiin ei hriet naw kâr hin a mi neitu, a mi siemtu le indintu suknawmnatu lo ni zing pal thei a ni leiin, HSA ṭhuoituhai khawm ṭawngṭaipui ei tiu.

Isu Krista le A Kohran hi ṭhe thei a ni nawh; Kohran ei ṭan tlatna hi Pathien a pakhatnaa ei sie tina a ni a, chu chu ei hnam damna ding khawm a nih. “I rawngbâwl nuom naw hnam le ram chu a bohmang âwm si a” (Isai 60:12). Khawvela hin hnam tîtham zet hi hril ding um ta lo tamtak an um, Krista Kohran ruok chu vân le inzawm tlat a nih (Heb. 12:22-23). Nakie lem chuh Khawvel lalram po po la tlu sie vawng a ta, Krista Lalram ruok chu chatuonin um zing a tih (Heb. 12:28; Daniel 2:44).

Krista Kohran ei siesângna hi Lalpa’n mi hre pêk zing sien, chu chu ram le hnam damnaah hung inchang mawl raw seh. Vawisûna Kohran lo hmu inhêk met hai khawmin, Kohran det-in-do zie an hung hrietchieng thar a, Kohran nêk zâwnga hmatieng peia kal an chawi nawna ding khawmin Krista lungril putin ṭawngṭaipui zing ei tiu.

Krista ta dinga Ṭhalai hai Lalpa’n sukhratin malsawm pei raw se cheu.

Krista Kohrana Pathien rawng in ibâwlpui, Central Kristien Ṭhailai Pawl âiawin.

Rev. Evan John
(Youth Co-ordinator)      

Ebenezar R. Sinate
(Secretary)

CENTRAL KRISTIEN THALAI PAWL
Independent Church of India