Hmarbiel North & South Presbytery KTP Leaders Meet Report

Central Kristien Ṭhalai Pâwl hmalâkna le Programme buotsaina hnuoiah Tarik 25 – 26, July, 2026 sûng khan Hmarbiel North & Hmarbiel South Presbytery inkawpin Parbung South ICI Biekin, Hmarbiel North Presbytery-ah, KṬP Leaders’ Meet hlawtling tak a hmang a nih. Hi hun a hin Presbytery Pahnih sûnga, Pesbytery Ṭhuoitu, Unit ṭhuoitu le KṬP members ṭhahnem tâwk tak el fe khâwm a nih.

Tarik 25, July, 2026 Inrinni chawhma le chawhnung; hi hun hi KṬP hmalâk dan ding le hmatieng peia Ṭhalai-hai kal chawi dân ding inhril hrietna hun a hmang a nia. Hi hun hi hunthum a ṭhe niin, Upa Lalruotṭhieng, Central Committee Member-in Programme a keiṭhuoi a. Hun khatna : Pu Ebenezar R. Sinate, Secretary CKṬP a inthawk ‘KṬP inrêlbâwl dân le KṬP kal hmang’ ti thupui a hmangin hnesaw takin a hril a; Hun hnina : Rev. Richard Rosiemlien, YCO-in ODC, Birthday Gift le KṬP Project-hai inhril hrietna a nei nawk a; Hun tâwpna takah, Upa V.L Renga Hriler, Chairman CKṬP a inthawk ‘Ṭhuoitu nina le Mawphurna’ ti thupui a hmangin KṬP Ṭhuoitu nina, khawsak dân ding le mawphurna hai tamtak a ma a inthawk ngai tlak a ni bawk a nih. Zân hun Worship Service Programme-a hmangin Upa V.L Renga Hriler, Chairman CKṬP a inthawk Pathienthu ropui takel ngaitlak nâwk a ni bawk a nih.

Chun tarik 26,July; Pathienni zîng le Zân Programme; Worship Service a hmang niin, Rev. Richard Rosiemlien, YCO a inthawk Pathienthu ropui tak tak el ngaitlak a nia, Central Choir-hai a inthawk inkhâwm zâtin Inpâkna hla ropuitak tak le hringtak tak el ngâitlâk a ni bawk a nih.

Pathienni chawhnung hi Rev. Richard Rosiemlien, YCO ṭhuoina hnuoi-ah Fellowship Programme a hmang niin; KṬP member-hai ta dinga thil ṭangkai le hmasawnna ding tamtak ama a inthawk ngaitlak a nia. Chun Hmarbiel North le Hmarbiel South KṬP Presbytery Secretary-hai a inthawk Ṭhalaihai râwngbawlna report tawi ngaitlak niin, hun kâr lakah inpâkna hla Malzai ngaitlakna neiin hi hun hi hlimum tak le hlâwktak a hmang a nih.

Join KṬP Leaders Meet chu hlâwktak le hlawtling tak a hmangin, Pathienni zan inkhâwm ṭinin a lo ṭumṭiek tah. Hmarbiel North & Hmarbiel South Presbytery, Kristien Ṭhalai Pâwl chun hieng ang Leaders Meet Programme hung buotsai pêktu CKṬP ṭhuoituhai chungah lawmum an ti tak zet a nih.

PHOTOS: