ICI Central Choir Bus inchâwk a ni tah

Hun sâwt tak Central KṬP-in project-a a lo nei tâk Central Choir Bus ding chu ICI Secretariat-in June 4, 2025 khan a lo inchâwk fel tah.

Central Choir Bus project-a ding hin hmun tina KṬP unit le Presbytery/Field/City Church hai bituk siemin, mimal intiemna dâm, inkhâwmpui thawlawm dâwlna le inhlâwna hai lo nei ta hlak a ni a. Sum hmu suok laia mi ₹ 15,00,000 khawm kum khat sûng Fixed Deposit-a lo sie a ni nghe nghe.

Kum 2024-a KṬP Central Committee Sitting No. 123, Aizawla nei a ni ṭum chun Central Choir Bus project hi sukpuitling a ni ngêi theina dingin project fund kuta um po hi Secretariat kuta pein, Secretariat-in bus inchâwk dân ding lampui hung dap el ta dinga intlun dinga rêl a ni a. Executive Council vawi 171-na fethlengin, Secretariat chun hma hrât takin a hung lâk a; Bethesda College of Nursing, Muolvaiphei (MRH&RC)-in ₹ 27 lakhs vêl sênga Bus thar hlawk December 2024-a an inchâwk, hmang khawm an la hmang hman meu naw chu, remchâng takin inchâwk sâwng an remti hlau a. Kohran hmunkhat vawng ei nina zâr peiah a man khawm ₹ 20 lakhs chauva inchâwk an mi phalpêk bawk a nih.

Bus inchâwkna man inhlânna chu Executive Council Hall, ICI Secretariat, Sielmatah June 4, 2025 khan, Central KṬP hrietpuiin, Secretariat le Muolvaiphei Rural Health & Research Centre (MRH&RC) inkâra nei a ni a. Rev. Lalneikhup Hmar, Executive Secretary-in introductory address pein, bus man inhlânna Rev. Dr. James R. Ruolngul, Secretary, Finance-in a nei a. MRH&RC Executive Director Upa Dr. H.L Liensangin lâwmthu hrilna neiin, bus chabi a pêk suok a, Rev. H.B Hluothang, Moderator-in Pathien kuoma inhlânna a nei. Hi programme-a hin MRH&RC, RWUS, Secretariat le Tuiṭhaphai Presbytery staff hai bâkah Central KṬP ṭhuoitu hai an ṭhang.

Bus hi rawngbâwlnaa hmang a ni theina dingin thuomhnaw siena ding (roof rack) a chunga inbûk a la ṭûl a, ṭhungna hai siem danglam met a la ṭûl bawk a, audio system inbûk le sukdanglam ṭûl met met a la um hai siem a ni zo pha a lâwmna programme a hrana la siem dinga riruong a nih.

Central Choir Bus project chu Central KṬP-in Secretariat kuta a pêk sâwng tâk a ni ang hrimin, bus hi Secretariat-in enkawl a ta, maintenance, servicing le a khaltu ding hai chen khawm maw phur vawng a tih. Bus enkawl dân le hmang dân ding thuah dân khawm draft mêk a ni nghe nghe.

KṬP pumpui huopa a kum têl project-a ei lo nei, Central Choir hai rawngbâwlnaa an hmang ding Bus thar hlawk ei lo nei el ta hi ei lâwm tak zet. Lalpa ropui tak raw se!