42nd KTP General Conference Report

ICI Central Kristien Ṭhalai Pâwl Programme siem, Kristien Ṭhalai Pâwl General Conference vawi 42-na, ‘Pathien Thu Nunpui’ (Joshua 1:8, Luka 1:46) ti thupuia hmang a, February 26 – March 01, 2026 sunga Mizoram, Sakawrdai khuoa innghat chu Pathien thlarau malsawmna tam tak leh hmang zo a lo ni tah.

Hi inkhawmpuia hin ICI kohran hnuoia Presbytery dang dang, City Church le Mission Field-a inthawkin palai le member fê khâwm a ni a, mikhuol riek lȗt po 2,500 bâwr vêl nia hriet a nih. Riek lȗt lo, ni tina inlân hai tiem sain Conference Hall-a inkhâwm hlak hi a tlângpuiin 3,500 lai an nih. Motor ke pali nei 200 bâwr vel le ke pahni nei 300 bâwr vel inkhâwmpuia ṭhang haiin an hmang niin Traffic tienga mawphurtu hai a’nthawk report dawng a nih.

KṬP member bakah ICI hotu lien hieng, Upa Dr. H.L. Liensang, Moderator ICI, Rev. Lalneikhȗp Hmâr, Executive Secretary, ICI, Rev. Lalrohlu. Secretary, Ministries, ICI le Rev. Dr. James R. Ruolngul, Secretary, Finance & Education, ICI hai khawmin hi inkhawmpui lien hi an hung uop bawk a nih.

Inkhâwmpui inbuotsai dân, programme hmang dân tlângpui le a kaihnawi dang dang hai, a hnuoia ang hin hung suklang a nih.

Inkhâwmpui hlâwtlingna dinga a’n tlungtu Hmârphei Presbytery hai, mâni mimal sin tlân sanin, tha le zung tam tak seng a, zân tam tak imu intuo loa an inbuotsaina hi hrilhmai ruol a ni nawh. Conference Organising Committee-in hmâ a ṭhuoi a, chu hnuoia chun Sub-Committee dang dang – Pandal Sub-Committee, Light & Sound Sub-Committee, Decoration Sub-Committee, Refreshment Sub-Committee, Ushering Sub-Committee, Information & Publicity Sub-Committee, Sanitation Sub-Committee, Traffic & Security Sub-Committee, Fundraising Sub-Committee, Reception Sub-Committee, le Medical Sub-Committee siemin, January thla lailunga inthawk khan, naupang, nupui, papui, ṭhalai, mani ta ang senga ngaiin an thaw mup mup el a nih. An mawphurna seng an thaw hnesaw dân chu hril sei ngai loin Conference Hall sung le puo tieng inlang dân le Inkhawmpui sunga an chêt dân fel fai zie khan a suklang. Hienga inbuotsaina fe mup mup lai zing hin a’n khât tawkin an phâk chin dâm, khawmuol um dân dâm, a fe haiin lampui an hraw ding dâm le dang dang, video tâwite te siemin an hung suklang zing bawk a, Inkhawmpui fe inhâwkna thar a mi siempêk hiel. Mikhuol tlungna ding le in-report-na ding counter fel fai thlapin an lo siem a, mikhuol hai ta dingin tlungin pan thuah buoina ding a um naw tawp el.

Central KṬP ṭhuoitu hai khawmin inbuotsaina an ṭana inthawk hin an vil hnê hle. Media Ministry Team fe thlengin fielna video hmu ding a um deu zut zing bawk. Conference Spotlight changtlung tak el an hung buotsai ei hei tiem zet chu a hun a tlung hma’n inkhawmpui ei lo intem lâwk a ni ringawt. Chu khela chun Mizoram Chief Minister, Bieltu MLA, Sinlung Hills Council ṭhuoitu, khaw sunga VC, khaw sung mipui le mimal tam tak khawma hi inkhawmpui hi a thu le practical-in an thlawp zie an suklang a, ei lâwmna a sukzuol hle a nih.

Upa Dr. H.L. Liensang, Moderator, ICI-in Conference hawngna hun ser a hmang a, KṬP hlapui sakin, Pathien biek inkhâwmna hun ṭan a nih. Pathien biekna Inkhâwm hun bîk hi ṭum ruk nei a ni a, ṭan zâna inthawkin boruok a ṭang ṭha hle. Meeting Chairman hai inkhawm ṭhuoi a fel fai hle. Pathien thu tiema ṭawngṭaina hun hmangtu hai hun hmang dân, tu lai ṭawng takin a smart thlap thlap thei khawp el.

Praise & Worship Team hla ṭhuoi a hring a, Lalpa’n mal a sâwm ngei a nih tî a chieng. Live Music remtu hai rimawi rem a’n balance ṭha hle a, mipui hla sak a zêm mâwi hnê hle

‘Aw Lalpa i ropui zie hi tuin am thu’n hril sê’ng an t’a?’, ‘Chun ka thla’n ka Sandamtu a’n pâk che, I ropui ie!’ ti mipuiin lungril le titak zeta ei hang sak khâwm kha chu hnuoi tieng ngainâ a bo vawng vawng el; inkhâwmpuia inthawk kui khan Pathien khawm a ropui zuol sawt amanih tî dingin a um a, kha’ng ang bâk khan vanram khawm a’nhawi chuong di’m a nih ei ti nuom deu thaw a nih.

Inpâkna hlapâwl saktu – ICI Central Choir, Serlui Presbytery Choir, Hmarbiel South Presbytery Choir, Cachar Presbytery Choir, Jiribam Presbytery Choir, Aizawl Presbytery Choir, Meghalaya West Presbytery Choir, Delhi City Church Choir, Hmarbiel North Presbytery Choir, Jinam Presbytery Choir, Guwahati City Church Choir, Tuivai Presbytery Choir, Assam Hills Presbytery Choir, Hmarphei Presbytery Choir haiin hla fê dân chi dang dang an sak hai a hring a, ngaithlâk a’n hawi a, ei dam vawng vawng el a nih. Choir haiin hla dang dang an sak a, vanrama lem chu Choir member chau ni lo, ringtu hai po poin hla pakhat (common song) ei la sak ruol dup dup ding inhawi ding zie a mi’n ngaituotir hiel.

Pathien biekna inkhâwm bâkah, hun bîk neia inkhawm hun haia hla saktu – Nk. Quilyn Lalrovel, Thangngur Awardee 2015, Nk. Evan. Werolyn Lalṭhapui, Thangngur Awardee 2017, Nk. Lalhmunmawi, Thangngur Awardee 2016, Nk. Lily Lalparmawi, Thangngur Awardee 2023, Nk. Lalrinhlu Infimate, Thangngur Awardee 2022, Nk. Rosy Roparmawi, Tuiṭhaphai Presbytery, Tuiṭhaphai Presbytery GroupSong, Delhi City Church & North India M/F Joint Choir, NTK Mission Field Choir hai an thiem bêk bêk a, hmu nuom le ngaithlak nuom a’n kawp si, hnung tienga ṭhung hai chun ring ei dâw fân awr awr el; zer far raka lo ngaithla tâwk khawm an bo nawh.

Conference thupui bêsanin, Pastor Alan L. Ṭhiek, Tuiṭhaphai Presbytery, Rev. Ramsiemsâng, P.S., Vangai Presbytery, Rev. Lalneikhup Hmar, Executive Secretary, ICI, Rev. H.P. Runremthang, Evengelist-at-Large, ICI, Rev. Lalrohlu, Seceretary Ministries, ICI le Rev. Evan John, Youth Co-ordinator, ICI hai a’nthawk sermon ngaithlâka um hai a ropui ngang el. Thu hril a hring a, “Pathien Thu hi a hring a,  thil a thaw thei a, kâwlhnâm ngeituo ieng ang nêk khawmin a ngei a, hringna le thlarau, ru le châng le thlin kawi dar khawp hielin a sun thei a…’’ (Heb. 4:12)  tî Pathien Thu hi an thu hril hai hin a sukdik hle. Ei zuk ngaithlâk a, ngaituona po po a fang suok a, lungril a’n tui hne hle a, ṭhalai fe khawm hai ta dingin chona nasa tak a mi siempêk a nih. Central KṬP Project laia pakhat suipuitlinga um tah, Central Choir Bus Project chu hi inkhawmpui huna hin Bus inchâwka um ngei hmu theiin a um ta leiin a lawmnain Mach 01, 2026, Pathienni 10:30 AM inkhawm ṭinin thingpui le bei ruoi kil tlâng a nih.

Video Live Streaming le thlalâk (Camera) mâwphurna latu Central KṬP Media Ministry Team, an kut suok a mawi a, an sin thaw a fel fai a, an mawphurna an hlen hne bêk bêk a nih. Video le Camera kil tin kil tang, an cover suok vawng tî thei a nih. Programme po po design mâwi takin screen-ah an kâp kai a, Online Streaming Platform (Youtube)-a Live Video khawm sawisel ding um lo khawpa quality ṭha a nih. Sound mawphurtu, PRO Sound hai product a ṭha hle, nasêt khawmin an hriet thei el di’m ti thei khawpa sound quality khawm ṭha a nih. Live Streaming lo entu hi a tlangpuiin mi 1,500 le 2,000 inkâr chu an ni zing a nih.

Inkhâwm huna hai hin thâwlâwm ṭum thum – Missionary Fund, Sakawrdai hmuna CKṬP Project Fund le Conference Fund dâwl a ni a, Pathien-in petu hai kut a sukzâng a, ṭum khat lem chu sing sari chuong dâwl dawk a nih. A ropui ngawt el.

FELLOWSHIP (YOUTH HORIZON)

Hi programme hi March 01, 2026 Pathienni chawhnunga hmang a ni a, ṭhalai tieng âwn bîka siem a nih. Pu Eric Ralsun le Nk. Ruthi Keivom, Guwahati City Church haiin hne saw takin programme an kei ṭhuoi a, inpâkna hla saktu, a chunga suklanga um ṭhenkhat hai a’nthawkin hla mawi tak tak ngaithlâk a nih. Motivational Speakers pahnih, Nk. Deborah Lalsiemtling, Project Co-ordinator, RWUS le Pu Finny Lalthansiama, CEO & Founder, Than Than Drinks & Unau Aqua hai a’nthawkin Motivational Speech ngaithlâk a nih. Fâk hmuna ding hin inhnik naw sa saâ sawrkar sin va nei tum kher loin, mani inhnikna zawnga thawa sum lam dawk tum lem ding thu dâm hrilin, anni tawnhriet ngeia inthawka an inchûk dawk, business basic knowledge dâm, mi dang siem suok ding chaua ngaina hi sukboa, ei rama ringawt khawm hin tum phawt chun fak hmuna khawp thaw ding a tam thu an hril chu lungril a sukvar huoi el. Sin inhnuoi te tea ei ngai, thaw thei dinga ei ni khawmin capacity ei nei hai, an ni’n an mit ngeia an hmu hai hmanga an hril chu ngaithlâk a manhlâ hle.

PRAISE

March 01, 2026 Pathienni zân inkhâwm ṭina nei a ni a, Rev. Evan John, YCO-in a kei ṭhuoi a, Rev. Thangngur Music Award le Buonglienkung Choral Award 2026 dawngtu hai (An hming chu a hnuoi tieng en rawh) bâkah, Nk. Quilyn Lalrovel, Rev. Thangngur Awardee 2015, Nk. Lalhmunmawi, Rev. Thangngur Awardee 2016, Rev. Zothanghrim, Rev. Richard Rosiemlien, Nk. Evan. Werolyn Lalṭhapui, Rev. Thangngur Awardee 2017, Pu Evan. Sam Philemon, NTK Mission Field, Nk. Elina Khawbung, Assam Hills Presbytery, Nk. Lalrinhlu Infimate, Rev. Thangngur Awardee 2022 hai a’nthawkin malzai ngaithlâk a nih. Boruok a hot a, lâm zâwla ṭhalai ruol hlim taluo inchâwm chu Western Celebrity (Hla sak thiem) hai concert pui tak tak hai a tluk hiel naw’m a nih; a’n ang nawna ruok chu ṭhalai ruol hlima inchâwm hai kha Pathien inpâk an ni tlat.

INRUOLSIEKNA

MALZÂI INRUOLSIEKNA (REV. THANGNGUR MUSIC AWARD)

Rev. Thangngur Music Award, Malzâi Inruoksiekna hi 31^st General Conference 2015 Sakawrdai khuoa nei ṭuma kha ṭan a ni a, tuta ṭuma hi a vawi rietna char a nih. Sakawrdai khuoa ding chun a ṭum hnina a nih. Contestant 13 an um a, chuong hai chu:

1. Mr. Immanuel Lalsansuok Ṭhiek, Khaddum, Meghalaya West Presbytery
2. Miss Judy Lalnunsiami, Aizawl, Aizawl Presbytery
3. Miss Valley Rose, Jinamnghat, Jinam Presbytery
4. Mr. Jire Lalditsak Faihriem, Muoldam, Cachar Presbytery
5. Miss Zothanpuii, Saitual, Tuivai Presbytery
6. Miss Katie Chatuon Laltuokkim, Lamka, Tuiṭhaphai Presbytery
7. Mr. David Lalsiesang Zote, Sakawrdai, Hmarphei Presbytery
8. Miss Remedy Vanlalzin, B. Huonveng, Jiribam Presbytery
9. Mr. Jeffrie Thangliensang Darngawn, Guwahati City Church
10. Miss Elina Lalpekzo Sungte, Bethel, Assam Hills Presbytery
11. Miss Sylvia Zairemsiem, Delhi City Church
12. Miss Hranghlunmawi, Kolasib, Serlui Presbytery
13. Miss Catherine Rodingpui, Senvon South, Hmarbiel South Presbytery

Endiktu hai:

1. Upa Lalruotṭhieng, Hmarbiel North Presbytery
2. Pu James Rochullo, Tuiṭhaphai Presbytery
3. Pu Solomon V. Hmar, Aizawl Presbytery
4. Tv. Albert L. Pangulate, Assam Hills Presbytery
5. Pu Lalthlawnpek Tusing, Music Instructor, ICI

Round thum inruolsiekna an nei a, Ruond 1-naah, Kristien Hlamawi Bua mi ngei hla pakhat an sak a, Round 2-naa hin anni hla dittak (own choice), Round 3-naah, Common Song, Independent Hla Bu No. 11, ‘Si-ar chunga sîng inremtu’ sakin inruoksiekna an nei. Round tin hi hun dang danga huoihawt a ni a, Round 3-na (Final Round) hi fam tah Rev. Thanngur a nau 8 hai laia a upa tienga a pathumna, (L) Pu Thanglien a naupa, Rev. Lalngailien Joute (1949 – 2023) hrietzingna ding le ama ngainatna zie suklangnain ‘REV. LALNGAILIEN JOUTE TRIBUTE NIGHT’ tia inbûkin hun hmang a nih. (L) Rev. Lalngailien Joute a nau hai laia naupang tak Mr. Samuel Joute-in hun a hmang a, Rev. Thanngur Music Award lâwmman sumfâi hi anni sponsor a ni zing laiin tuta ṭuma dawngtuin Music Video a siem hmasa tak an tumpêk sa ding thu a hril chu mipuiin an lâwm hle.

Endiktu hi a thiem ṭhal thlang dawk ni hai sien khawm inruolsiek hai an thiem inruol em leiin an lu a’n hai ve map ti chu a chieng. Round 3-a mi an points hmu hai bel khâwmin Rev. Thangngur Music Award 2026 dawngtu chu Nk. Judy Lalnunsiami, Aizawl Presbytery a nih. Lawmmana hin sumfâi ₹ 50,000/-, Trophy le Music Video pahni siempêk le kum khat sûng thla tin ₹ 2,500/- honorarium dawng a tih.  (L) Rev. Lalngailien Joute a naupa Tv. Emmanuel Lalchunghnung (a hming hi Rev. Thangngur a nuhmei Pi Ṭhakim-in a phuok a ni nghe nghe) in sumfai le Trophy hi a’n hlân a, contestant dang hai po hi ₹ 2,000/- seng Consolation prize pêk an ni bawk.

HLAPÂWL INRUOLSIEKNA (BUONGLIENKUNG CHORAL AWARD)

Buonglienkung Choral Award Hlapâwl Inruolsiekna khawm hi kum 2015-a kha ṭan a nih. Tuta ṭum Presbytery dang dang le City Church-a inthawka ṭhang hai:

1. Hmarphei Presbytery
2. Delhi City Church
3. Aizawl Presbytery
4. Assam Hills Presbytery
5. Jiribam Presbytery
6. Tuiṭhaphai Presbytery
7. Guwahati City Church
8. Serlui Presbytery
9. Cachar Presbytery
10. Hmarbiel North Presbytery
11. Meghalaya West Presbytery

Endiktu hai:-

1. Pu Lalthlawnpek Tusing, Music Instructor, ICI
2. Pu Diamond Malsawmthang, Choir Conductor, ICI Central Choir
3. Rev. Zothanghrim
4. Pu Solomon V. Hmar
5. Pu Jacob Thanghmingsang
6. Upa Lalruotṭhieng
7. Pu James Rochullo
8. Tv. Solomon Zote

Presbytery le City Church hlapâwl haiin an hla thiem tak seng an hang sak chu mit le na a tlai cham cham ie. Criteria dang dang dungzuia endiktu hai points bel khâwm hnungin Buonglienkung Choral Award 2026 dawngtu chu Meghalaya West Presbytery an nih. Lâwmmana hin pawisa sumfai ₹ 40,000/- le Trophy le Music Video pakhat siempêk tî a sawm a, (L) Pu Buonglienkung naupa Tv. Gospel Buongzarlien-in sumfâi le Trophy hi a’n hlân nghe nghe. Contestant dang hai po kuomah ₹ 3,000/- seng Consolation prize inhlân a nih. Hi Inruolsieknaa hin Best Choir Conductor lâwmman siem sa hlak a ni a, tuta ṭum Best Choir Conductor lâwmman dawngtu chu Tv. Christopher Lalrawngbawl Inbuon, Guwahati City Church a nih. Hi lâwmman hi Assembly Musical Board-in a tum hlak.

2026 Rev. Thangngur Music Award dawngtu Nk. Judy Lalnunsiami hi Aizawl ICI kohran-in banner hai siemin ropui takin an lo hmuok a, Buonglienkung Choral Award dawngtu Meghalaya West Presbytery Ṭhalai Pâwl hai khawm Presbytery Standing Committee-in lâwmna thingpui le bei siemin an lo tuok bawk. Hi hin ei Award siem hai ngaihlut a hlâw tâk zie a suklang a, lungril suklâwm hle.

February 27, 2026 10:30 AM in Sakawrdai ICI Sub-Hqtrs. Biekinah rorêlna hun hi nei a nih. Palai fê khâwm hi mi 209 an ni a, mi 71-in apology an pêk a, absent hi 41 an um bawk. KṬP Hlapui sakin, Pastor Zothanghrim-in Pathien thutak tiemin, ṭawngṭaina hun a hmang a, rorêl ṭan hmain General Conference kârlaka chung tieng mi lo fe san hai sȗnna hun hmang a ni a, Pastor James Lawrence-in sȗnna hun ser a hmang. Member fam mi lo changsan hai –

1. Mr. Sangrokhum Zate, Saron, Assam Hills Presbytery
2. Miss Nancy Ramengzo Faihriem, Doheng, Assam Hills Presbytery
3. Mr. Laltuoklien, Retzawl, Assam Hills Presbytery
4. Mr. Lalneimuong, Sakawrdai, Hmarphei Presbytery
5. Mr. Ngursanglien, Sakawrdai, Hmarphei Presbytery
6. Miss Lalramngai Hmarveng, Sakawrdai Hmarphei Presbytery
7. Mr. Ramtiemthang, Mauchar, Hmarphei Presbytery
8. Mr. Buonthangpui, New Vervek, Hmarphei Presbytery
9. Mr. Lalremruot Thiek, Lailongsora, Cachar Presbytery
10. Mr. Lalchuoilo, Diglangmukh, Cachar Presbytery
11. Mr. Lalzuilien Hrangchal, Sub.Hqrs Hmarkhawlien, Cachar Presbytery
12. Mr. Solomon, Diger, Cachar Presbytery
13. Mr. Lalsiemruol, Diger, Cachar Presbytery
14. Mr. Lalramfel, Diger, Cachar Presbytery
15. Mr. Joshea S. Khawzawl, Muoldam, Cachar Presbytery
16. Mr. Timothe Vanlalruot Tuolor, Guwahati, Guwahatu City Church
17. Mr. Sinlungthang, Saipum, Serlui Presbytery
18. Mr. Soiminthang, Ngurte, Tuiṭhaphai Presbytery
19. Mr. Robert Lalnuntluong, Ngurte, Tuiṭhaphai Presbytery
20. Mr. Satgunlien, Ngurte, Tuiṭhaphai Presbytery
21. Mr. Jehova Lalneisuong, Muolvaiphei, Tuiṭhaphai Presbytery
22. Mr. Thangbieksiem, Muolvaiphei, Tuiṭhaphai Presbytery
23. Mr. Anthony Lalthlamuana, Rengkai, Tuiṭhaphai Presbytery
24. Upa Dr. Crossthang Sanate, Shillong, Meghalaya West Presbytery
25. Mr. Lalhmingthang, Ankhasuo, Jiribam Presbytery
26. Mr. Thlangbiaka Nampui, Khoingoi, Meghalaya East Presbytery
27. Mr. Solomon Darnei, Saipung, Meghalaya East Presbytery

Kristien Ṭhalai Pâwl thiltum 11 hai hi ei zâwm lo le ei hriet lo a um nuol a, ei ngaisak dân a’n khuongruol naw leiin a thei chun byheart seng a, mani umna hmun seng tlung huna khawm member haiin an hriet seng theina dinga ṭhang la dingin Chairman-in palai fê khâwm hai a’n châ.

2025 sunga YCO rawngbâwlna report tawi fel deuin ngaithlâk a ni a, a tlangpui thu a hnuoia suklang ang hi a nih.

1. Gospel Camp nei zât – 08
2. Crusade – 06
3. Retreat – 01
4. Leaders’ Meet – 02
5. Discipleship cum Counsellor Training – 02
6. Urban Ministry (Mumbai) – 01
7. Conference – 01

Hma tieng rawngbâwl dân dinga ṭha a ti hai a hnuoia ang hin suklang a ni bawk-

1. KṬP member puo tieng (khawpui le foreign) chena um an tam ta leiin an hming le contact number list (directory) Unit, Presbytery le Central-a ṭhuoitu hai chenin kawl inla, thla khata vawi khat bêk unit ṭhuoitu hai khawmin Phone Call annawleh WhatsApp hmangin contact hlak inla.
2. Khawpuia um hai hi ṭhalai deu vawng an ni tâk leiin Headquarters hin Mobile Pastor nei inla khawm YCO hin kum khata khawpui pakhat kan thei sien.
3. Khawpuia um ṭhalai hai hi KṬP member an nina a bo chuong naw leiin Unit le Presbytery ṭhuoitu haiin ṭhalai rawngbawlna ngai pawimaw a, ODC le Birthday Gift le a dang dang hai hung ngai pawimaw dingin hril uor nâwk zuol inla.
4. Ṭhalai Pâwl hnung sawn loa ei rawngbawlna ar deu deu theina ding a nih ti hrein, Unit, Presbytery le Central chena ṭhuoitu haiin KṬP thiltum tak hre zingin, mâni hma zâwn senga rawngbawlna phur suok tumna nei lien nâwk zuol sau inla.

Rorel huna hin resolution 20 thlak a ni a, chuong hai laia a langsar zuol deu hai-

1. October 28 – 30, 2026 sunga nei ding North East India Christian Council (YA) Youth Fest ICI kohran-in intlung dinga an hung ngen angin ICI Sub-Hqtrs. Muolhoia innghat dinga rel a nih.
2. KṬP Bye-Law 2023, tuta hmang mek hi review thaw dinga rel a nih.
3. ODC thaw ṭha hai en dân (criteria) hi Birthday Gift ang bawka en ta dinga rel a ni a, tuta ṭum Inkhawmpui hin hmang nghal a nih.
4. Kum 2031 KṬP General Conference (Rorel Inkhawmpui) chu Guwahati City Church-a innhat dinga rel a a nih.

Rorel zo zan tieng hin CKṬP fund hmangin ruoi kil tlâng a nih.

Central Kristien Ṭhalai Pâwl-in General Conference hun peia chawimawina a pêk hlak chi thum a um a, chuong hai laia chi hnia chun tuta ṭum hin pêk ding an um nawh. Category 3-naa mi Central Committee-in chawmawi tlaka a ngai hai, Conference Session huna a’n tlun hlak chu tuta ṭum khawm hin Rimawi Khawvela thaw hlâwk em em mi 2 recommend-in an um a; 42^nd General Conference-in a pawmpui angin March 01, 2026, Pathienni 10:30 AM inkhawm hunah chawimawina thu ziek inhlân an nih. Chuong hai chu:

1. Pu Solomon V. Hmar: Pu Solomon V. Hmar hi April 01, 1983-in Leisen khuo, Pherzawl District-a pieng a nih. A nu Pi Lalvarkim-in harsa taka a enkawl puitling a nih. St. Edmund’s College, Shillong-a a kai laiin a pieng thar a, Tonic Solfa hung inhnik tung peiin Junior a’nthawka Diploma chen a hma tiemin a hung zo vawng a. Solfa a thiem hnung hin Pathienin nasa nawk zuolin a hmang a, thlaraua chau ngawi ngawi, mi tam tak kei harna le châwmna hla tam tak a hung phuok ta a nih. Tu chen hin hla 120 bawr a phuok ta a, Pathien-in a hmang a, ṭawng dang danga inlet khawm a um nuol tah. Term khat sûng ICI Central Choir Conductor a lo chel bawk. A hla phuok hai fe thlenga kohran le ṭhalai pâwl huonga rawngbâwlnaah a thâw hlâwk zie enin hi châwimawina hi inhlân a nih. Ama hi tu hin Bank of Baroda-a Manager niin, a nuhmei a nau hai leh Durtlang, Aizawlah an khawsa mêk.

2. Pi Lalruotmawi: Pi Lalruotmawi hi September 08, 1980 kumin Thenmuol, Tuiṭhaphaiah a pieng. A chanchin hi hril tam ngai loin a hla sak haiin Zoram Khawvel a de’ng hni’ng nasat zie kha mita hmutu le naa hretu tam tak ei um ring a um. ICI Central Choir-a kum tam lo ṭhangin, rawngbawlna a nei. A music album hmasa tak ‘Lalpa Hmangaina’ ti chu 2003 kum bul khan tlâng zar a nih. Hi kum ma, kum tâwp tieng hin ‘Lal Davida Khawpui’, Christmas Album ropui deu el chu tlâng zar nâwk a nih. Tu chen hin hi album-a hla hai hi Christmas zâta ei la ngâi nghawk thei naw chu a nih. Kum 2005 kum tâwp tieng khan ‘Thiem Thû Hril Thei Kan Ta Nawh’ ti album a tlângzar a, kum 2006 khan ‘Ka Hausakna Lalpa’ ti album a siem a, 2009 in Independent Hla Album a siem nâwk bawk. Kum 2004-a ICI Central Choir-in Mizoram Tour an nei ṭuma Lalruotmawi hla sak le a hnunga a hla hai Pathien-in a hmang nasat ziet kha aw, kha’ng lâwm lâwm khan hla sak a hring thei am a nih ti khawp hiela vawisun chena mi mak tî a la ni zing. Mizorama hmun ṭhenkhat hming hi, ama hming chawia inbûk iemani zât a um. Chawimawina inhlâna um hi ama a hung thei naw leiin a sanga, Pu James Rochullo-in a lo dawng pêk. Kum 2007 Dec. 12 khan Rev. Rammawia Pachuau leh inneiin, tu hin an sungkuoin, an nau hai leh Bangalore-ah an khawsa mêk. Chawimawina inhlân nî hin Conference chibai bûkna le a lâwm thu hrilna video, mipui en thei dingin screen-a suklang a nih.

General Conference hun peia pêk hlak lâwmman tuta ṭuma dawngtu hai chu a hnuoia hai hi an nih.

1. ODC pe ṭha tak – Muolvaiphei KṬP (Petu zât – 213, pêk zât – ₹ 1,68,021/-)
2. Birthday Gift pe ṭha tak – Madanrting, Shillong KṬP (Petu zât – 136, pêk zât – ₹ 28,500/-)

Hi hai baka hin ODC le Birthday Gift a pahnia pe ṭha ve ve unit hai Consolation prize pêk an nih. Chuong hai chu –

1. Hmunsang KṬP, Hmarphei Presbytery
2. Pherzawl KṬP, Hmarbiel North Presbytery
3. Bethel KṬP, Assam Hills Presbytery
4. Ramhlun Sports Complex Vengthlang KṬP, Aizawl Presbytery
5. Jowai KṬP, Meghalaya West Presbytery

• Overall Activities Award – Aizawl Presbytery.

Central KṬP Media Ministry Team-in 42^nd General Conference Fielna Reels siem inel a buotsai, lawman dawngtu chu Project D, Lamka KṬP an ni a, certificate le pawisa sumfâi ₹ 3,000/- inhlân an nih. Result hi a’n hma tieng puong a ni a, anni hin Inkhawmpui sunga programme hmang hai ni tina mi short video siem mawphurna an hung lâk sunzawm pei a nih. Hi inelnaa ṭhang ve, a hnuoia suklanga um hai kuoma khawm hin Certficate of Participation inhlân a nih.

1. Madanrting ICI KṬP Shillong
2. Michael Paugoulian, Saidan
3. The Vine Group, Assam Hills Presbytery
4. Delhi City Church
5. John Sielhnam, Saikot North
6. Lamka ICI KṬP
7. Ratu ICI KṬP

Ṭum dang ang bawkin Tonic Solfa, Intermediate & Diploma Certificate Exam, February 27, 2026 Inrinni khan ICI South Sakawrdai biekinah, Assembly Musical Board-in a huoihawt a, mi 7 exam hai laiah mi 3-in hlawtlingna an chang. Chuong hai chu:

Intermediate

1. Mr. James Lalsandam, Muolhoi, Assam Hills Presbytery – 2^nd Division
2. Mr. Lallawmzuol, Parbung North, Hmarbiel North Presbytery – 2^nd Division
3. Mr. Immanuel Pakhumate, Hmarveng, Tuiṭhaphai Presbytery – 2^nd Division

A chung tienga suklang bâka khan Unit tinin Presbytery fe thlenga CKṬP-a report form ei submit dungzuiin a chunga heading suklanga um hi a tawi thei ang takin, a kawpin, a pawimaw zuol hai chau a hnuoia hin ei hung suklang sa a nih.

1. Member zât: Pasal – 5,617, Nuhmei – 3,320, Total member – 8,937
2. Presbytery – 15, City Church – 02, Mission Field – 06
3. Unit um zât – 241
4. Unit tamna tak – Tripura Mission Field: Unit 28
5. Member tamna tak hai:
6. Tuiṭhaphai Presbytery – Member 2,237
7. Assam Hills Presbytery – Member 1,029
8. Cachar Presbytery – Member 729
9. Kohran dân khatnaa innei hi 54 ei um lain, dân hninaa innei ruok hi chu 227 ei um dai thung.
10. Missionary Support/châwm
11. CKṬP hminga chawm (full support) zât – 1, Evan. Lalhminglien Joute, Ganganagar, NTK Mission Field
12. Unit le City Church haiin ei support zat – 45
13. Presbytery KṬP hminga support – 19
14. Missionary support po po – 65
15. Finance
16. ODC petu zât – 4,725, pêk zât – ₹ 21,60,829/-
17. Birthday Gift petu zât – 4,411, pêk zât – ₹ 4,48,600/-

43^rd Gen. Conference (Rorêl Inkhâwmpui), 2027 – Saipung, Meghalaya East Presbytery
44^th Gen. Conference (Mipui fê khawm), 2028 – Sesawng, Aizawl Presbytery
45^th Gen. Conference, (Rorêl Inkhâwmpui), 2029 – Tuivai Presbytery
46^th Gen. Conference (Mipui fê khâwm), 2030 – Tuiṭhaphai/Hmarbiel North Presbytery
47^th Gen. Conference (Rorêl Inkhâwmpui), 2031 – Guwahati City Church.

Khuo a lum a, inkhawmna hall tuol tuia chap hû pâwl an um zing a, mi’n inhawi taka Inkhawmna Hall-ah Pathien an inpâk lai nisa lum hnuoiah motor tlan vel enkaitu le security mawphurna laa, Hall puo tieng le lampui bul vel taima taka lo viltu, Security Team-in an mawphurna an lo thaw mawl mawl zing bawk. Mi’n lum an ti laia dei lo ti deu pâwl hai ta dingin thingpui lum hlawt hlawt zuk inchawk el thei ding a um zing a, lum ti haiin tui dei, mafu tui le lassi dei riem el zuk inchawk el thei ding tuolah a um zing bawk. A va’n hawi de aw! Tuta ṭum General Conference neina hmun chu vanram tlafuol an iti ang kha niin ka hriet. Hall tuolah nunghak, tlangval, hmel ṭha deu khawm, tlawma hmel sie deu khawm ei inkat nuk zing a, a’n hawi chum chum hle.

March 01, 2026, Pathienni zân, Programme suktâwpnaâ KṬP hlapui sakna mawl kha aw, hril sa lo dingin inpâm a um. A hlâ hrim hrim kha Pathienin a hmang ti naw ruol a ni nawh. Hall sunga um hai chu hril lo, tuola inlawn kuol nuk nuk hai le hotel-a buoi em ema thil lo zawr pawl chen khawmin Music Track ri an hriet chara inza em ema an ngir ṭhap el kha lungril a tâwk hle. Hlapui sak sûng chu châng der loa ursûn taka an lo zâwm ve el kha, kha’ng anga Hlapui sak ei ursûn zie le ei inzâ zie suklangna kha ICI KṬP chanchina chu a vawi khatna ni ngei a tih. Rev. Joseph L. Khawbung, P.S. Hmarphei Presbytery-in Benediction hrilin, Conference a khâr. Phal lo tak le inpâm ngawi ngawi zingin KṬP General Conference vawi 42-na chu ei inthla a, a lo ṭumṭiek ta a nih.

Pathien ṭhuoina le venghimna zarin mani khawsakna hmun ei tlung seng ta ring a um. Lalpa’n mi ṭhuoi sien, ei umna hmun sengah Isu hminga chân ngam, tuor ngam, tlasam ngam, var insuotu, Pathienin a hmang nuom dân ang taka a hmang thei ding Ṭhalai member, Pathien Thu nunpuitu ni seng dingin ei inditsak.

CKṬP Media Ministry aiawin,
Report Petu: Hmingropui Sungte

All photos from the 42nd General Conference: Google Drive