North East India Christian Council Youth Assembly (NEICCYA)-in kum 2 dan peia inkhâwmpui a nei hlak Biennial Assembly vawi 20-naah ICI Central KṬP hmingin Pu Ramchullo Faihriem (Central Committee Member) le Pro. Pastor Stephen D. Sinate hai an ṭhang thei a. Inkhâwmpui report an pêk angin ei hung insuo a nih.
NEICCYA 20th Biennial Assembly 2025 a host-tu chu Garo Baptist Convention (GBC) a ni a, a hmun hi GBC Balupara Permanent Camp Site, Tura khawpuia inthawk 33 km-a hla, hmun fienriel, tlâng inhawi tak le zau tak a nih. A hun: May 16 – 18, 2025.
Hi hmuna hin GBC haiin building complex ropui tak el an bâwl a. Building hi ground tiem sain floor nga a nih. A chung tak top floor-ah hall lien pahni a um a – pakhat chu la zo lo a ni a, pakhat chu zo ta sa a ni a, hi taka hin inkhâwmna service hmang a nih. Inkhâwmna hall hi capacity 800 bawr vel ni’ng a tih. Room lien 88 vel a um thei a, room khata hin mi 10 inhawi deua um theina a nih. Bathroom lien floor tina a um a, open shower inhawi tak tak, vawi khatin mi 10 hai insil theina a nih. Dining hall lien tawk tak pandal an bawl a, rawsûr hnuoia khawm inhawi deuin bu fak thei a nih. Tuol zâwl (ground) chîn le a lien iemani zat a um a, bus a za têl khawm chawi inla parking problem um lo ding khawpa hmun zau a nih. An lampui hai khawm kohranin a siem a, black topping le block an dâp tlung tawp el a nih.
Mikhuol fe zat
(1) Total delegates: 400+
(2) Assembly Session Palai: 297
(3) Hlapawl:
– JS KJP Synod Choir
– Church of God Choir
– GBC Choir
– ECM Choir
– Mizoram Synod Choir
– RBP Synod Choir
Assam le Bodoland haia inthawk khawm palai ṭhahnem tawk tak an hung ṭhang ve a nih.
Fak le dawn thua khawm a bula inthawk a tâwp chen breakfast, lunch, day time tea le dinner hai a’n hnik thei patâwpin an buotsai a, tui dâwn ding khawm tlasam loin, kawi tina hmu thei zingin a um.
Steward (nunghak tlangval tlâwmngai) an rengin mi 50 an nih. An inpek zo zie chu hrilin a phâk nawh. Rawsûr hnuoia khawm ruo doin sin an thaw a, bathroom mipui chetna a ṭawp hlak hai khawm ni tin inkhâwm kâr an lo sukfai hlak a, staircase le hall hai bal hman loin, a sûn a zânin an sukfai rân a, zîng dâr 6:00 AM-a ei tho khawma an uniform leh mani sin senga an buoi mup mup hmu ding an um ran el. Fak le dawn hai khawm a timing siema um chu pêl dêr loin, a hun zat zata fa le dawn thei dingin an buotsai a nih; inchuk ding ei hau hle.
Business session chung chang:
President-in hun hawngna a nei zoin recording secretary pahni thlangna kan nei a, chu zoa Unit report ngaithlak a ni a, unit 30 vel a inthawk report ngaithlak a nih. Ei Kohran aiawin Pro. Pastor Stephen D. Sinate-in report thiem deuin a va pek ve a nih. Unit tam tak hai chu ei rawngbawl dân enin ei khûm ve niin a’n lang.
Finance report Treasurer a inthawk felfai deuin ngaithlak a ni a, eini khawm fees ei chawi ding anga an mi bituk chu a pe ta pawlah ei ṭhang thei hi a ropui tak zet.
Proposed Budget 2025-2027 entlangna kan nei a, aproved a nih. Audit thaw lo a la ni leiin Auditor pahni ruot nghalin, zan inkhawm ṭîna audit zoin, report fel tak hung siemin, palai fekhawm hai po po Pathienni zingkar dar 8:00 AM-a inkhawm nawkin, hrietpuina thu namdet a nih.
Secretary report felfai tak ngaithlak a nih.
NEICCYA magazine sukpuitling thei loa um chungchang ngaituo zawm a ni a, a harsatna thu hai report ngaithlak a ni zoin, palai fekhawm hai in Biennial Assembly handbook siema um mek hi kimchang lemin upgrade inla a huntawk tiin thlak danglam a ni tah.
21st Biennial Assembly hi Haflong hmunah um a ta, Cachar Hill Tribes (CHT) Synod-in host a tih.
Inter-denominational youth service Aizawl le Shillong, Meghalaya haiah ngaithain um sien khawm Haflong area-ah uluk taka fepui le hlawk taka hmang hlak a ni report ngaithlak a ni hnungin, fe pei sien kan ti a, Coordinator ruotin, hmun danga khawm hrat taka hma lak ni ta sien tiin rel a nih.
North East Youth Fest chungchang khawm ngaituo nawn a ni a, a hlâwkin, a ṭangkai leiin fe zawm pei sien tiin rel a nih.
2025 – 2027 sûnga Office Bearers ding hai Kohran tinin recommend a thaw hai pawmna thu puong a ni a, ei Kohran CKṬP aiawin Upa Dr. Challiensung chu Executive Committee member-a dinga ruot a nih.
Inkhâwm dân tlângpui:
GBC haiin Praise and Worship hnesaw takin inkhâwm zat an mi ṭhuoi hlak, inchûk ding ei hau hle.
Inkhawm zat Choir pali le panga inkâr ngaithlak a ni zie. Live Music ngei hmanga hlapui ngaithlak hlak a ni a, ei Choir hai khawm hmasawnna ding an la hau hle.
Power backup le sound system operator hai sawisel ding a um naw tawp.
Seminar vawikhat nei a nih. Environment chungchanga ringtu ei ni anga Pathien Thu le inhmein thing le ruo le rannung hai humhal le enkawlna mawphurna ei nei zie hai ngaithlak a nih.
Variety program: Musical le cultural thil hai en nuom um tak tak le talent nei tak tak haia inthawk ngaithlak le en a ni a, a ropuiin mit le na a thlei hle a nih.
Ei Central Choir hai program-ah an chuong si, an hung thei naw chu a pawi ngawt el, a nawk pha chu hma ṭhuoitu ni dingin ṭhang lapui seng ei tiu.
Ecumenical ministry hi ei la uksak phâk rak naw mani ding, member ei ṭhang si chun a hma ṭhuoitu ni tum inla nuom a um khawp el. A neitu bîk tu khawm an um nawh. Ei active zo naw thu hotu haiin an mi hril a, hmatieng ṭhang hung la thar dingin an mi’n fui a nih. Ei palai Upa Dr. Challiensung ei suong bawk a, nasa deuin hma hung la ṭan dingin ditsakna ei inhlan nghal a nih.
Hotu hai ditsakna dawnga inkhawmpui liena ka ṭhang phâk hi lawm um ka ti tak zet. Inchûk ding tamtak le hriet thar ding tam tak ka hmu thar leiin vangnei ka’n ti hle a nih.
Ramchullo Faihriem
Central Committee Member
ICI Central KṬP
