Tuivai Presbytery KṬP inkhâwmpui in a lo rêl dungzuiin, khuo tinah Camp/Crusade nei dinga a ti angin Rev. H.P. Runremthang, EAL Speaker a hmangin Khawlian ah 18-21, August sûng Camp nei a ni a, Camper 22 lût in Sandamna fel tak chang vawngin malsâwmna tamtak dawng a nih. Karkhat sûng Follow-Up programme Local le siemin Camp sunzawmna angin kohranin a sunzawma kohran têlpui khawm Pathien malsâwmna thar tak an dawng nasa hlê.
Phuaibuang ah 22-24, August sûng Crusade in hmang sunzawm a ni a. Biekin inleng lo rak khawpin Crusade hi hlawtling taka hmang a nih. Pathienni chawhnu tieng programme siemchawpin Worship-a hmang a ni a, hla ṭhuoi dân, hla dit bîkhai thlangna huna hmangin inhawi takin hun hmang a ni bawk. Phuaibuang Kohran hin an ditkhawp naw êm êma, kohran dang chen khawmin hieng ang programme buotsai ni nâwk sien an duthusâm an hril uor hlê a nih.
Saitual ah 26-30, August inkâr Camp nei nawk a ni a, camper 37 lûtin mi 4 chu an ṭhang tluongsuok thei ta naw. Zu ngawlvei leh Biekin pan ta ngailo ṭhahnem takhai in Pathien Thlarau pâwl tharna le malsâwmna tamtak dawng a nih.
August 30, Pathienni chawhnu tieng khan Saihmar Tlâng, Saitual ah ṭawngṭaina Bethel nei a ni a, Ṭhalai leh kohranhai a thar taka Thlarau pâwltharna dawng a nih. Ṭhalaihai lai thlarau sinthaw tlungin hnuoia inthal pheng phunga Pathien chibai bûk le ṭawngṭainaa hmang a ni kha a ropui hlê.
Camp/Crusade sûng hin PS le Pastor hai counsellor ni nghâlin a bula inthawk a tâwp chen ṭawiawm a ni bawk.
Tuivai Presbytery ah hieng ang Camp/Crusade ropuitaka hmang zo a ni hi lungril lâwmin a sip. Ṭhalaihai in harna le siemthar nâwkna a thar tak tamtakin an dawng hi ropui ei ti hlê.
Report petu:
Pastor Johny Laldinthar F Tusing
CKṬP Media Ministry Correspondent, Tuivai Presbytery
